SQO-da byltyr 200-den astam balany kene shaqty
PETROPAVL. QazAqparat – Soltústik Qazaqstan oblysynda byltyr 672 adamdy kene shaqsa, sonyń ár úshinshisi 14 jasqa deıingi bala, dep habarlaıdy QazAqparat tilshisi.
Kúnniń jylynýymen túrli jándikter de tirilip, keıbiri adamdarǵa qaýip tóndirmek. Solardyń biri – kene.
SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, kóktemde kene belsendiligi artady, al adamdy shaqqan jaǵdaıda kene entsefalıtin juqtyrýy múmkin.
«Kene entsefalıti – ortalyq nerv júıesin zaqymdaıtyn jedel ınfektsııalyq aýrý. Onyń aǵzaǵa áseri ártúrli. Keıbiri tolyq táýir bolyp ketse, endi biri bul ınfektsııadan keıin múgedek bolyp qalady, tipti kóz jumýy múmkin. Aýrýdy jólek kene taratady.
Aldyn alý úshin jylda kene entsefalıtiniń tabıǵı oshaǵynda jumys isteıtinderge vaktsınatsııa júrgiziledi. Ekpe úsh jylda bir ret, kúzdiń sońynda jasalady. Vaktsınatsııa turǵylyqty mekenjaı boıynsha tirkelgen emhanada júrgiziledi. Biraq ekpe almas buryn dárigerge kóriný qajet», - deıdi SQO Sanıtarııalyq-epıdemıologııalyq baqylaý departamenti bóliminiń basshysy Saltanat Merǵalımova.
Epıdemıologtyń aıtýynsha, keneden saqtaný qajet, ol úshin jeńi uzyn, aq tústi kıim kıgen jón. Aq kıimnen kene anyq kórinedi.
«Ádette kene shópte nemese butada otyrady, ol 1,5 metrden bıikke kóterilmeıdi. Sondyqtan adamnyń aıaǵyna jabysyp, joǵary órmeleıdi. Adamǵa jabysqannan keıin shaǵýǵa, kózge túspeıtin oryn izdeıdi.
Sondyqtan daladan kelgende ústińizdi anyqtap qarap shyqqan jón.
Kenege qarsy qazir túrli repellentter jetkilikti, olar krem, gel jáne spreı túrinde de satylady», - deıdi Saltanat Merǵalımova.
Al atalǵan jándik shaqqan jaǵdaıda medıtsınalyq kómek alý úshin emhanaǵa barý qajet.
«Jylda oblysta kene, masa jáne shirkeımen kúresý úshin dezınsektsııalyq jumystar júrgiziledi.
Byltyr SQO-da kene shaqqan 672 adam, sonyń ishinde 204 bala dárigerdiń kómegine júgindi.
Keneniń oıanatyn kezi jaqyndady, sondyqtan saqtyq sharalaryn umytpaýdy eske salamyz», - deıdi sanıtar dáriger.
