SQO-da byltyr 170-ke jýyq adam iz-túzsiz joǵaldy

Soltústik Qazaqstan oblystyq Polıtsııa departamentiniń málimetinshe, 36 jastaǵy Vıktor Raskatov Petropavl qalasyndaǵy úıinen 2019 jylǵy 30 qyrkúıekte shyǵyp ketip, iz-túzsiz joǵalǵan. Boıy shamamen 160 sm, orta deneli, kózderi jasyl tústi, shashy – sarǵylt-qara, basynyń keı jerlerinde shashy túsken, qastary sırek. Ústinde sur tústi trıkosy, qara-jasyl tústi kýrtkasy, qara bas kıimi bolǵan.

Polıtseıler sondaı-aq úıinen shyǵyp ketip, qaıtyp oralmaǵan Baqyt Hamzınaǵa da izdeý jarııalady. Baqyt Hamzına 1971 jyly týǵan. Shal aqyn aýdanynyń Jańatalap aýylyndaǵy úıinen 2019 jylǵy 18 qarashada shyǵyp, belgisiz baǵytqa ketip qalǵan. Boıy 160 sm, orta deneli, aq shashty. Ústinde qyzyl kýrtkasy, toqylǵan qara bas kıimi, sur tústi djınsy bolǵan.

Vedomstvodan málim etkendeı, byltyr óńirde barlyǵy 169 adam joǵaldy. Onyń ishinde 159 adam tabyldy. 111-niń júrgen jerin polıtsııa qyzmetkerleri sol táýlikte anyqtady. 169 jaǵdaıdyń 25-inde kámeletke tolmaǵandar joǵalǵan. Olardy izdeýge erekshe kóńil bólinedi. Jasóspirimderdiń barlyǵy tabylyp, úılerine qaıtaryldy.

«Otbasylarynda nemese jaqyndarymen sózge kelip qalyp, renjisý adamdardyń joǵalýyna jıi sebep bolady. Kelesi bir sebep – alkogol. Ótken jyly joǵalyp ketken 169 adamnyń 75-i – spırttik ishimdikti ishýdi ádetke aınaldyrǵandar, olardyń 26-sy – áıelder. Osyndaı adamdardy izdeý kezinde kóńil kóterý oryndaryna basa nazar aýdarylady. Tájirıbede adamdardyń nápaqa tabý úshin turǵylyqty ornyn aýystyryp, basqa eldi mekenge ketip qalýy da jıi kezdesedi. Keıin jaqyndaryn, týystaryn umytyp, baılanysqa shyqpaıdy», - deıdi SQO PD Krımınaldyq polıtsııa basqarmasynyń bastyǵy Petr Klımov.

Joǵalǵan adamdar týraly qandaı-da bir aqparat bolǵan jaǵdaıda «102» arnasyna nemese 8-(7152) 39-41-78, 8-707-820-30-29 telefondary arqyly SQO PD Krımınaldyq polıtsııa basqarmasynyń qyzmetkerlerine, 8 (7152) 39-48-37, 39-48-07, 8-747-239-11-61, 8-707-909-50-06 nómirleri arqyly Petropavl q. polıtsııa basqarmasyna, 8 (715)-34 2-01-45; 50-04-29, 8-705-160-31-07 telefondary arqyly Shal aqyn aýdany polıtsııa bólimi krımınaldyq polıtsııa bólimshesine habarlasýǵa bolady.