SQO-da byltyr 13 adamnyń ajaly sýdan boldy
PETROPAVL. QazAqparat - Soltústik Qazaqstan oblysynda bıyl eki adam sýǵa ketti. Qaıǵyly oqıǵaǵa qaýipsizdik erejelerin saqtamaý sebep, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, búginde óńirde shomylýǵa arnalǵan 58 oryn bar. Olardyń 12-si kólde, qalǵandary Esil ózeninde ornalasqan. Alaıda keı turǵyndar eskertýge mán bermeı, qaýipti jerlerde shomylýdy ádetke aınaldyrǵan.
«Byltyr 13 adam, onyń ishinde 2 bala sýǵa ketti. Bıyl eki adam qaza tapty. Sebebi - qaýipti jerlerde nemese mas kúıinde shomylǵan. Balalardy sý jaǵasynda qaraýsyz qaldyrý jáne balyq aýlaý kezinde qaýipsizdik erejelerin saqtamaý da qaıǵyly aıaqtalady. Sońǵy bes jylda 100-den astam adamdy qutqardyq, sonshasy sýǵa ketti. Adamdardyń ólimine jol bermeý úshin barlyq kúsh-jigerimizdi jumsaýymyz kerek», - dep atap ótti SQO TJD jedel-qutqarý jasaǵynyń basshysy Altaı Tezekpaev.
SQO-da ázirshe sýǵa shomylý maýsymy ashylǵan joq. Soǵan qaramastan qutqarýshylar kúndelikti reıdter ótkizýde.
«Eresekter men balalar sýǵa shomylatyn jerlerde, jaǵajaılarda, demalý oryndarynda «shomylýǵa tyıym salynady» jazýymen 57 belgi, 29 kórneki stend ornatyldy. Balalar jazǵy demalysqa ketpes buryn mektepterde ata-analardyń qatysýymen jınalystar ótkizdik», - deıdi azamattyq qorǵanys bóliminiń aǵa ofıtseri Kırıll Ivannıkov.
Sondaı-aq qazirgi ýaqytta halyqty jedel habardar etý maqsatynda «Darmen» mobıldik qosymshasy iske qosyldy. Qutqarýshylardyń aıtýynsha, qosymsha smartfonǵa tez jáne tegin ornatylady. «Darmen» arqyly Qazaqstannyń kez kelgen óńirinde paıdalanýshy joldardyń jabylýy jaıly, mektepterde sabaq bolmaıtyndyǵy, aýa raıy týraly jáne taǵy basqa aqparatty birden ala alady.
