SQO-da byltyr 1 myńnan astam júrgizýshi mas kúıde ustaldy
SQO polıtsııa departamenti baspasóz qyzmetiniń málimetinshe, 14 qańtar kúni polıtseıler Petropavldaǵy Jýkov kóshesinde «Lada Priora» avtokóligin toqtatqan. Rýlde 21 jastaǵy jigit bolǵan. Medıtsınalyq kýálandyrý onyń mas kúıde kólikti basqarǵanyn rastady. Sottyń úkimimen júrgizýshi 15 táýlikke ákimshilik qamaqqa alyndy jáne 7 jylǵa deıin kólikti basqarý quqyǵynan aıyryldy.
Al 18 qańtarda Petropavldyń patrýldik polıtsııa batalonynyń qyzmetkerleri Ǵ. Músirepov kóshesinde «Honda Element» avtokóligin toqtatqan. Kólikti 38 jastaǵy qala turǵyny tizgindegen. Medıtsınalyq kýálandyrý er adamnyń mas ekenin kórsetti. Tekserý barysynda polıtseıler avtokóliktiń Nur-Sultan qalasynan aıdap áketilgenin, onyń izdeýde ekenin anyqtady. Júrgizýshi 15 táýlikke qamaqqa alyndy. Kólik aıyp turaǵyna qoıyldy. Petropavldyq polıtseıler jınalǵan materıaldardy astanalyq áriptesterine tapsyrady.
Aıta keteıik, byltyr SQO-da 238 jol-kólik oqıǵasy tirkelip, onda 315 adam jaraqat alǵan, 37 adam qaza bolǵan. Jol-kólik oqıǵasynda kóz jumǵan ár altynshy adamnyń ólimine mas júrgizýshiler kináli. Byltyr osylaısha 6 adam mert bolyp, 40 adam jaraqat aldy.
«Byltyr oblys aýmaǵynda 1049 mas júrgizýshi ustaldy. Olar spırttik ishimdik iship rólge otyryp, óziniń ǵana emes, basqa da jol qozǵalysyna qatysýshylardyń ómirine qaýip tóndiredi», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
