SQO-da buryn-sońdy asfalt bolmaǵan 51 eldi mekende jol salyndy

ASTANA. KAZINFORM — Soltústik Qazaqstan oblysynda eshqashan asfalt bolmaǵan 51 eldi mekenge jol salynǵan. Bul týraly óńir ákimi Ǵaýez Nurmuhambetov eseptik kezdesýinde aıtty.

Soltústik Qazaqstan oblysynda avtomobıl joldarynyń uzyndyǵy 8,4 myń shaqyrymdy quraıdy. Elimizdegi joldardyń uzyndyǵy boıynsha oblys 2-shi orynda tur.

— Bıyl 1,1 myń shaqyrym jol jóndeý jumystarymen qamtyldy. Onyń ishinde 467 shaqyrymy – respýblıkalyq, 540 shaqyrymy – jergilikti jáne 100 shaqyrymy – kentishilik joldar, — dedi Ǵ. Nurmuhambetov elordada Ortalyq kommýnıkatsııalar qyzmetinde. 

Sonymen birge, 10 jyldan astam ýaqyt boıy jóndelmegen respýblıkalyq mańyzy bar joldarǵa aýqymdy jóndeý júrgizildi. Onyń ishinde «Petropavl-Jezqazǵan» jáne «Mámlút-Qostanaı» ýchaskeleri bar. 

— 2029 jylǵa deıin oblys ortalyǵyndaǵy barlyq kóshege tolyǵymen asfalt tóseý josparlanǵan. Sońǵy úsh jylda 63 kóshede alǵash ret asfalt paıda boldy. Sondaı-aq, eldi mekenderdiń kóshelerine, ásirese shekara mańyndaǵy aýdandarǵa erekshe nazar aýdarylady. Bıyl buryn eshqashan asfalt bolmaǵan 51 eldi mekende jóndeý jumystary júrgizildi, — dedi Ǵ. Nurmuhambetov. 

Jyl qorytyndysy boıynsha normatıvtik jaǵdaıdaǵy joldardyń úlesi 89% deıin, al respýblıkalyq jeli boıynsha 88% deıin jetkizilgen. 
Aıta keteıik, SQO-da sý tasqynynan qorǵaıtyn bógetter qaıta jańartylyp jatyr.

Sondaı-aq, qaıtarylǵan aktıvter qarajatyna jańa sý qubyry tartylǵan.