SQO-da buralqy ıtter turǵyndardyń qus-malyna aýyz saldy
PETROPAVL. KAZINFORM – Soltústik Qazaqstan oblysy Beskól aýylynda buralqy ıtter jurttyń qorasyna túsip, qustaryn qyryp jatyr.
Bul otbasy osymen ekinshi ret buralqy ıtterden zardap shegip otyr. Bir aı buryn 70 shaqty taýyǵyna buralqy ıtter aýyz salsa, bul joly 250 taýyǵyn qorada qyryp ketken.
Bir kún buryn osy aýylda taǵy bir otbasy qoradan ár jerde mamyǵy shashylǵan taýyq ólekselelerin tapqan. bul oqıǵany polıtsııaǵa resmı túrde tirketip, keltirilgen materıaldyq shyǵyndy óteýdi talap etip otyr.
Jergilikti halyq mundaı oqıǵalardyń jıi qaıtalanatynyn aıtady. Byltyr tamyzdy kórshi Chapaev eldi mekeninde buralqy ıtter bir úıdiń shashpada turǵan 12 qoıyna shapty. Qazir adamdar balalaryn mektepke jalǵyz jiberýge, kóshege velosıpedpen shyǵarýǵa qorqatyn kúıge jetken.
Beskól aýyldyq okrýginiń ákimi Gúlsim Kárimovanyń aıtýynsha, bul jaǵdaıda veterınarııa salasy jaýap berýi tıis.
— Buralqy ıtterdi aýlap, chıpteýmen aýdandyq veterınarlyq qyzmet aınalysýy tıis, — deıdi aýyl ákimi.
SQO veterınarııa basqarmasynyń bas mamany Madıana Tıýgýmbaeva bul jaǵdaıǵa baılanysty túsinikteme berdi. Bul bir ǵana otbasynyń shyǵyny emes, búkil óńirde júıeli túrde sheshilmeı kele jatqan problemanyń saldary bolyp shyqty.
— 2022 jylǵy 2 naýryzda qabyldanǵan «Janýarlarǵa jaýapkershilikpen qaraý týraly» zańǵa sáıkes, buralqy jáne ıesiz janýarlarǵa qatysty jańa talaptar bekitildi. Bul zań aıasynda buralqy ıtter men mysyqtardy atýǵa tyıym salynǵan. Endi olardyń sanyn sterılızatsııa arqyly ǵana retteýge bolady.
Máselen bıyl Petropavlda 300 qańǵybas ıtti sterılızatsııalaý josparlanǵan. Tamyz aıynyń sońyna deıin 232 ıtke ota jasaldy, jumys qarasha aıynyń sońyna deıin tolyq aıaqtalýy tıis, — deıdi Madıana Tıýgýmbaeva.
Mamannyń aıtýynsha, ár aýdanda aýlanǵan janýardy ýaqytsha ustap, sterılızatsııa men chıpteıtin ýaqytsha ustaý ortalyǵy bolýy tıis.
— Aıyrtaý, Aqjar, Esil, Jambyl, M.Jumabaev, Tımırıazev, Taıynsha jáne Shal aqyn aýdandarynda ýaqytsha ustaý pýnktteri salynǵanymen, qajetti veterınarlyq jabdyq bolmaǵandyqtan jumys istemeı tur.
Ǵabıt Músirepov atyndaǵy aýdanda nysannyń qurylysy júrip jatyr. Al Aqqaıyń, Qyzyljar, Mamlıýt, Ýálıhanov aýdandarynda jáne Petropavl qalasynda mundaı ortalyqtar áli de salynbaǵan, — deıdi basqarmanyń bas mamany.
Buǵan deıin SQO-da 13 myń ıt-mysyq esepke alynǵanyn jazǵan edik.