SQO-da buralqy ıtter malǵa shaýyp jatyr
PETROPAVL. KAZINFORM – Soltústik Qazaqstan oblysy Qyzyljar aýdanynda qańǵyǵan ıtter turǵyndardyń qoradaǵy malyn talap jatyr.
Beskól aýylynyń turǵyny keshke jumystan úıge kelgende shashpadaǵy qoshqaryn óli tapqan.
– Aýla bıik qorshaýmen qorshalǵan. Qalaı kirgenin bilmeımin, qańǵyrǵan ıtter qoshqardy talap, ishin jaryp ketti, - deıdi er adam.
Beskól turǵyny Serikbaı Jamansalımov te qańǵyrǵan ıtterden zardap shekken. Iesiz janýarlar onyń qorasyna kirip, 44 taýyǵyn qyryp tastady.
– Bul aýylda turyp jatqanyma biraz boldy. Tek bıyl ǵana qańǵyrǵan ıtter maza bermeı jatyr. Aýdandyq polıtsııa bólimine aryz jazdym. Biraq esh nátıje joq. Buralqy ıtterdiń sany kóbeıip jatyr. Qazir mal-qusqa shapsa, erteń adamdardy talamasyna kim kepil, - deıdi Serikbaı Jamansalımov.
Budan buryn Beskól aýylynda buralqy ıtter turǵyndardyń qorasyna túsip, bir úıdiń 70, ekinshisiniń 250 qusyn qyryp ketken edi.
SQO veterınarııa basqarmasynyń málimetinshe, «Janýarlarǵa jaýapkershilikpen qaraý týraly» Zańǵa sáıkes, qańǵyrǵan ıtter men mysyqtardyń sany — olardy ustaý, sterılızatsııalaý, chıpteý, vaktsınatsııalaý jáne tabıǵı ortasyna qaıta jiberý arqyly retteledi.
– Qyzyljar aýdanynda ázirge qańǵyrǵan janýarlardy ýaqytsha ustaý pýnktteri joq, sondyqtan bul janýarlardy ýaqytsha ustaý múmkin emes. Aýdan ákimdigi Olshanka aýylynan 110 ıtke arnalǵan ýaqytsha ustaý pýnktin salý úshin jer telimin bóldi, búginde jobalyq-smetalyq qujattama ázirlengen. Al úı janýarlaryn kútip-baǵý jáne serýendetý qaǵıdalaryn buzǵandarǵa Ákimshilik quqyq buzýshylyq týraly kodekstiń 407-2-baby boıynsha ákimshilik jaýapkershilik kózdelgenin eske salamyz, - deıdi basqarma mamandary.
Eske salsaq, osyǵan deıin Petropavlda ıt qapqan 53 adamnyń dárigerge qaralǵanyn jazǵan edik.