SQO-da býllıng týraly habarlamaǵany úshin úsh mekteptiń dırektory men muǵalim jazalandy
PETROPAVL. KAZINFORM — Soltústik Qazaqstan oblysynda mindetin tıisti deńgeıde oryndamaǵan 524 ata-ana jaýapkershilikke tartyldy.
Petropavlda kámeletke tolmaǵandar arasyndaǵy qylmystyń aldyn alý jáne oǵan qarsy kúres sharalary jaıynda SQO prokýratýrada aıtyldy.
Óńirde balalardy zorlyq-zombylyqtan, sýıtsıdten qorǵaý, aldyn alý jáne olardyń quqyqtaryn qorǵaý maqsatynda keshendi jospardy iske asyrýdy kózdegen, 40 pýnktten turatyn óńirlik jol kartasy bar. Petropavl mektepterinde býllıngke qarsy kúreske jasandy ıntellekt jumyldyrylǵan. Beınebaqylaý júıesi balalardyń agressıvti minez-qulqyn anyqtap, arnaıy baǵdarlama arqyly málimetterdi mektep ákimshiligine jiberedi.
— SQO-da elimizde alǵashqylardyń biri bolyp qaýipti jaǵdaılar men agressııany naqty ýaqyt rejıminde anyqtaı alatyn «aqyldy» vıdeosaraptama júıesi iske qosyldy. Agressııa baıqalǵan jaǵdaıda birden jaýapty tulǵalarǵa habarlama jiberiledi. Qazirgi tańda bul júıe qalanyń jeti bilim berý nysanyna ornatylǵan. Aldaǵy ýaqytta bul júıemen oblystaǵy barlyq mektepti qamtý josparlanyp otyr, — dedi oblys ákiminiń orynbasary Júsip Jumaǵulov.
Prokýrorlardyń aıtýynsha, qalada jáne aýdandarda quramyna qadaǵalaý organy, polıtsııa ókilderi, mektep ustazdary men psıhologtar kirgen mobıldi toptar jumys isteıdi. Mamandar jyl basynan 2,3 myń otbasyny aralap, muqtajdarǵa qajet kómek kórsetti. Mindetin durys atqarmaǵan 524 ata-ana jaýapkershilikke tartyldy. Sondaı-aq, býllıng faktileri týraly habarlamaǵany úshin 3 mektep dırektory men 1 muǵalimge shara qoldanyldy.
Jıynda mektep oqýshylary týraly jaǵymsyz aqparattar taratqan Telegram-arnalar da sóz boldy.
— Mundaı chattardyń bar ekeni týraly aqparat túskennen keıin, olardy buǵattaý boıynsha dereý sharalar qabyldandy. Tıisti hattar mınıstrlikke joldandy, nátıjesinde chattar buǵattaldy. Biraq ázirge bul chattardy qurǵan adamdar anyqtalǵan joq, — deıdi oblys prokýrorynyń birinshi orynbasary Abý-Álı Sattar.
«Kıbernadzor» aqparattyq júıesi arqyly balalar otyratyn 27 zańsyz kontent pen bir telegram-arna buǵattaldy.
Jalpy, 2024 jyldyń qorytyndysy boıynsha jasóspirimder qylmysy 10,5% artyp, 42 fakti tirkelgen. Balalarǵa qatysty qylmystyń 89-y tirkelip, bir jylda 43,5% ósken. Bıyl bul ekeýi boıynsha da kórsetkish tómendep otyr. Balalardy zorlaý faktileri bolmaǵan.
Buǵan deıin Bas prokýror jasóspirimder qylmysy kóbeıgen óńirlerdi ataǵanyn jazdyq.