SQO-da buǵy atqandarǵa 10 mln teńge aıyppul salynady
PETROPAVL. QazAqparat - Soltústik Qazaqstan oblysy Aıyrtaý aýdandyq ishki ister bóliminiń qyzmetkerleri zańsyz buǵy aýlaǵandardy anyqtady, dep habarlaıdy QazAqparat tilshisi oblystyq ІІD baspasóz qyzmetine silteme jasaı otyryp.
Aýdandyq polıtsııaǵa Zarııa aýylynyń eki turǵyny «Kókshetaý» memlekettik tabıǵı qoryǵynyń Shalqar fılıalynyń aýmaǵynan buǵyny zańsyz atyp alǵany jóninde málim etilgen. Aqparatty tekserý barysynda ol rastaldy.
Brakonerlik jasady degen kúdikpen 1984 jáne 1994 jylǵy eki aýyl turǵyny ustaldy. Jigittiń biriniń úıinen buǵynyń eti, al ormannan ańnyń basy jáne terisi tabyldy. Tirkelmegen 16 kalıbrli eki ańshy myltyǵy, oq, balta jáne eki shańǵy tárkilendi.
Qazirgi ýaqytta et saraptamaǵa jiberildi. Osy oqıǵa boıynsha QR QK-niń «Zańsyz ań aýlaý» 337 baby 4 bóligi boıynsha sotqa deıingi tergeý bastaldy. Atalmysh bapta bes jylǵa bas bostandyǵynan aıyrý jáne 5 myń AEK kóleminde aıyppul salý qarastyrylǵan.
