SQO-da búginnen bastap ormanǵa barýǵa tyıym salyndy
SQO tabıǵı resýrstar jáne tabıǵatty paıdalanýdy retteý basqarmasynyń málimetinshe, oblys aýmaǵynyń 5 %-yn ǵana ormandy alqap alyp jatyr. Memlekettik orman sharýashylyqtarynyń mindeti – aǵash ósirý, ormandardyń aýmaqtaryn úlkeıtý jáne aǵash aýrýlarymen kúresý.
«Biz óz mindetimizben aınalysýdyń ornyna ormandardy qoqystan tazartyp, órtpen kúresip kettik. Ormannan qoqysty shyǵarýǵa sharýashylyqtarǵa arnaıy qarjy bólinbeıdi. Sondyqtan olar tehnıka bólip, adamdaryn ormandy tazartýǵa shyǵarýǵa, túrli ekologııalyq aktsııalar uıymdastyrýǵa májbúr. Bul is-sharalarǵa qatysatyndar da negizinen ormanshylar, ekologtar, tabıǵatty qorǵaý prokýratýrasy, tabıǵatty qorǵaý polıtsııasy jáne stýdentter men oqýshylar», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bas mamany Qaırolla Baıteńizov.
Ormanǵa zaqym keltirgenderge, qoqys tastaǵandarǵa ákimshilik jaza bar. Aıyppuldyń mólsheri 10-250 AEK mólsherinde.
Byltyr ormanǵa qoqys tastaǵan 18 adam, ormandaǵy órt qaýipsizdigi erejesin buzǵan 188 adam shyǵynnyń ornyn toltyryp, aıyppul tóledi.
Esterińizge salaıyq, SQO-da búgin ormanǵa barýǵa tyıym salatyn qaýly kúshine endi. Qaýlynyń oryndalýyn mobıldi toptar qadaǵalaıdy. Talapty buzǵandarǵa aıyppul salynbaq.