SQO-da brakonerler sottaldy
PETROPAVL. KAZINFORM – SQO-da bir jyl buryn ustalǵan brakonerler toby sottaldy.
ІІM baspasóz qyzmetiniń málimetinshe, buǵan deıin soltústikqazaqstandyq polıtseıler asa iri kólemde jasalǵan zańsyz ań aýlaýdyń ashylǵany týraly habarlaǵan. 2023 jyldyń basynda Soltústik Qazaqstan oblysy Polıtsııa departamenti uıymdasqan qylmysqa qarsy kúres basqarmasy qyzmetkerleriniń nazaryna Sibir elikterin ónerkásiptik aýqymda brakonerlik jolmen atyp alýmen aınalysatyn adamdar toby tústi.
Aqpan aıynyń sońynda VAZ-2115 avtokóligimen júrgen Petropavl qalasynyń úsh turǵyny ustaldy. Tekseris barysynda kólikten tirkelmegen tegis uńǵyly eki myltyq pen Sibir eliginiń tórt denesi tabyldy. Odan ári jedel-izdestirý is-sharalary barysynda saıajaı ýchaskeleri birinde qoıma men músheleý tsehy tabyldy. Bul jerden polıtseıler janýarlardyń 2 denesin, 40 teri, 12 bas pen 119 tuıaq tárkiledi. Qylmystyq topqa taǵy bir soltústikqazaqstandyqtyń qatysy bary anyqtaldy.
Uıymdasqan qylmysqa qarsy kúres basqarmasy qyzmetkerleri bul adamdar brakonerlik qyzmetpen baılanysty zańsyz bıznes qurǵanyn anyqtady. Olar uıymdasqan qylmystyq topty quryp, kóshbasshy, mergen, qasapshy júrgizýshi bolyp ózara bólip alǵan áreketterin iske asyrǵan. Uıymdasqan qylmystyq top qatysýshylary brakonerlik kásipti júzege asyrý úshin tirkelmegen qarý, oq-dári, gılzalar men bytyralar satyp alǵandyǵy anyqtaldy. Atyp alynǵan jabaıy janýarlardyń etin tanystaryna ótkizip otyrǵan. Sarapshylardyń qorytyndysy boıynsha memleketke 68 mıllıon teńgeden astam shyǵyn keltirildi.
Atalǵan faktiler Qazaqstan Respýblıkasy Qylmystyq kodeksiniń 262-baby men 337-baby boıynsha sotqa jiberildi. Qylmystyq toptyń basshysy atanǵan, buryn jeke tulǵaǵa qarsy qylmys jasaǵany úshin sottalǵan 31 jastaǵy petropavldyq sot úkimimen 11 jylǵa bas bostandyǵynan aıyryldy. Sot onyń qylmysqa birge barǵandardy 8 jylǵa bas bostandyǵynan aıyrý týraly sheshim qabyldady.
Úkim zańdy kúshine engen joq.
