SQO-da brakonerler qabandardy Kalashnıkov avtomattarymen atqan

PETROPAVL. QazAqparat – Soltústik Qazaqstan oblysynda orman sharýashylyǵynyń qyzmetkerleri saý, shirimegen ormannyń aǵashtaryn sanıtarlyq kesýge bergen, dep habarlaıdy QazAqparat tilshisi.

Bul jaıynda brıfıngte QR Sybaılas jemqorlyqqa qarsy is-qımyl agenttiginiń SQO boıynsha departament jetekshisiniń birinshi orynbasary Nurlan Jahın aıtty.

SQO Sybaılas jemqorlyqqa qarsy qyzmet Orman sharýashylyǵy jáne janýarlar dúnıesi aýmaqtyq ınspektsııasynyń sybaılas jemqorlyq qaterine syrtqy taldaý júrgizdi.

«Inspektsııaǵa orman qorynyń tıimdi paıdalanýyna memlekettik baqylaý júrgizý mindettelgen. 2019 jyly sybaılas jemqorlyqqa qarsy qyzmettiń óndirisinde «Qyzyljar» orman sharýashylyǵynyń qyzmetkerlerine qatysty qylmystyq is boldy. Olar paıda tabý maqsatynda sanıtarlyq kesýge sapaly, shirimegen ormannan aǵashtardy berip kelgen», - dedi Nurlan Jahın.

Ótken jyldyń tamyz aıynda osy sharýashylyqtyń dırektory alty jylǵa bas bostandyǵynan aıyrylyp, memlekettik qyzmette laýazymdy ıelený quqyǵynan ómir boıyna aıyryldy. Sottyń isti qaraýy barysynda onyń aǵashty kesýge ruqsat berý barysynda birneshe ret para alǵany anyqtaldy.

Janýarlar dúnıesine qatysty byltyr oblysta 12 qylmystyq quqyqbuzýshylyq tirkelgen, kelgen shyǵyn 28,2 mln teńge shamasynda. Onyń tek 3,5 mln teńgesi ǵana óndirilip alynǵan.

«Inspektsııa qyzmetkerleriniń aıtýynsha, sotqa deıingi is júrgizý organdarymen ózara árekettiń bolmaýy negizgi máselelerdiń biri. Sondaı-aq qylmystyq quqyqbuzýshylyqqa jol bergenderdi anyqtaýda da qıyndyqtar týady», - deıdi Nurlan Jahın.

Sonyń bir mysaly – 2018 jyly qarasha aıynda Jambyl aýdanynda bolǵan brakonerlik deregi. Sol joly belgisiz bireýler Kalashnıkov avtomattarynyń túrli modıfıkatsııalarymen bes qabandy atyp ketken bolatyn. Áli kúnge deıin brakonerler anyqtalǵan joq. Keltirilgen shyǵyn mólsheri – 4,5 mln teńge.