SQO-da brakonerler erekshe qorǵalatyn aýmaqta elik aýlaǵan
SQO Polıtsııa departamenti baspasóz qyzmetiniń málimetinshe, Aıyrtaý aýdanynyń tabıǵatty qorǵaý polıtseıleri men qoryqshylar kezekti reıd barysynda «Kókshetaý» memlekettik ulttyq tabıǵı parki aýmaǵynda zańsyz ań atty degen kúdikpen 5 adamdy ustady.
Polıtseılerge Galıtsyno eldimekeniniń turǵyny habarlasyp, orman jaqtan myltyq daýsyn estigenin habarlaǵan. Reıdte júrgen mamandar aqparatty teksermek bolady. Galıtsyno eldimekeniń mańynda olarǵa «Lada Granta» jáne «VAZ 21114» avtokólikteri qarsy shyqqan.
Birinshi kólikte 29 ben 35 jas aralyǵyndaǵy 4 jergilikti turǵyn bolǵan. Al ekinshi kóliktiń 26 jastaǵy júrgizýshisi polıtseıler toqtatqan kezde kólikti tastaı qashypty. Alaıda ol da alysqa uzamaı ustaldy.
Tekserý barysynda «VAZ 21114» avtokóliginen úsh sibir eliginiń eti, 1991 jyly týǵan aýyl turǵynynyń 12 kalıbrli «TOZ-34» myltyǵy jáne kastetke uqsas buıym tabyldy. Ustalǵandardyń aıtýynsha, taǵy ekinshi myltyq bolǵan. Ony oqıǵa ornynan qashqan jigit qoldanǵan eken. Ázirge qarý tabylǵan joq.
Bul derek Sotqa deıingi tergep-tekserýdiń biryńǵaı tizilimine «Zańsyz ańshylyq» baby boıynsha engizildi.
«Zańsyz ań aýlaý deregi óńirde júrip jatqan «Brakoner» jedel-aldyn alý is-sharasy aıasynda anyqtaldy. Qazir tabıǵatqa keltirilgen shyǵyn mólsheri anyqtalyp jatyr. Jeńil kólikter arnaıy turaqqa qoıylyp, kúdiktilerge qatysty kelýge mindetteý túrindegi bultartpaý sharasy qoldanyldy», - deıdi Aıyrtaý aýdandyq polıtsııa bóliminiń bastyǵy Marat Serkeshev.
Buǵan deıin SQO-da artemııa salına shaıanyn zańsyz aýlaǵan brakoner jaıynda jazǵan edik.
