SQO-da brakoner 4,5 tonna qyzyl shaıandy zańsyz aýlaǵan
PETROPAVL. QazAqparat – Soltústik Qazaqstan oblysynda tártip saqshylary 4,5 tonna artemııa salına shaıanyn zańsyz aýlaǵan Taıynsha aýdanynyń turǵynyn ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Taıynsha aýdanynyń polıtseıleri jáne SQO PD Krımınaldyq polıtsııa basqarmasynyń qyzmetkerleri birlese reıd ótkizgen. Іs-shara barysynda tártip saqshylary «ZıL» júk kóligin toqtatty. Kólikten salmaǵy 4,5 tonna artemııa salına shaıany salynǵan 105 qap tabyldy. 1987 jyly týǵan jergilikti turǵyn kóliktegi júkke qatysty qujattardy kórsete almady.
Atalǵan fakti «Urlyq» baby boıynsha Sotqa deıingi tergep-tekserýdiń biryńǵaı tizilimine engizildi. Kúdiktige qatysty kelýge mindetteý túrindegi bultartpaý sharasy qoldanyldy. Júk kóligi arnaıy turaqqa qoıyldy.
Shyǵyn somasy ázirge belgisiz. Polıtsııa qyzmetkerleri oqıǵanyń mán-jaıyn anyqtaýǵa qatysty jumysty bastap ketti.
«Artemııa salına shaıany farmakologııada qoldanylatyn qundy shıkizat. Ol «qara bazarda» suranysqa ıe jáne qymbat turady. Sonysymen de kópshiliktiń qyzyǵýshylyǵyn týdyrady. Alaıda shaıan tárizdi jándikteri bar kólder jalǵa alynǵan. Artemııa salınany urlaý faktileri buryn da tirkelgen. Bul jaǵdaı jyl basynan beri Taıynsha aýdanynda shaıan tárizdilerdi tárkileýdiń eń iri kólemi bolyp otyr», - deıdi aýdandyq polıtsııa bóliminiń bastyǵy Nurlyjan Aqtanov.
Oblysta ótkizilip jatqan «Brakoner» jedel-profılaktıkalyq is-sharasy aıasynda 23 mobıldi top quryldy. Tártip saqshylaryna ańshylyq sharýashylyqtardyń qoryqshylary da kóp kómek kórsetedi. Jalpy «Brakoner» is-sharasy bastalǵaly oblysta tabıǵatty qorǵaý zańnamasyn buzýdyń 246 deregi tirkeldi. Negizinen ań aýlaý erejelerin buzýǵa qatysty, ıaǵnı 208 jaǵdaı anyqtaldy. Zańsyz atylǵan 5 ańnyń eti, 8 qarý tárkilendi.
Ekologııalyq qylmystar boıynsha 9 qylmystyq is qozǵaldy.
