SQO-da bir jylda jylý tarıfi 33 paıyzǵa qymbattady

PETROPAVL. KAZINFORM – Soltústik Qazaqstan oblysynda qarasha aıynda ınflıatsııa jyldyq esepteýmen alǵanda 9,4%-dy kórsetti. Baǵalar ótken jyldyń sáıkes kezeńimen salystyrǵanda, azyq-túlik taýarlaryna – 6%, azyq-túlik emes taýarlarǵa – 9, aqyly qyzmetterge – 13,5% ósti. 

Ulttyq statıstıka bıýrosynyń SQO boıynsha departamenti baspasóz qyzmetiniń málimetinshe, bir jyl ishinde tuzdalmaǵan sary maı baǵasy – 12%, nan – 10,5, tuz – 10, kúnbaǵys maıy – 9,5, alkogolsiz sýsyndar – 9, et 4%-ǵa qymbattaǵany tirkelgen.

Kerisinshe jarmalar – 29,5%-ǵa, qant 5%-ǵa arzandap otyr. 

Jas kókónisterdiń baǵasy orta eseppen 17%-ǵa ósti, sonyń ishinde qyzanaq – 44, qııar – 37, pııaz 16%-ǵa qymbattaǵan, biraq qyzylsha – 24%, sábiz 16%-ǵa arzandady. 

Jeke bas tutynýyna arnalǵan taýarlar men prıborlar – 12%-ǵa, farmatsevtıkalyq ónimder – 9, kıim jáne aıaq kıim – 10, jýý jáne tazalaý quraldary – 8, zergerlik buıymdar men saǵattar 7%-ǵa bir jyl ishinde qymbattaǵan. 

AI-95, AI-96 markaly benzın 4%-ǵa qymbatqa satylyp jatyr.

Ortalyqtan beriletin jylýdyń tarıfi 33%-ǵa ósti.

Turǵyn úı úshin tólenetin naqty jaldaý aqysy – 20,5%, ambýlatorlyq qyzmetter – 9%-ǵa kóterildi.

Demalys, oıyn-saýyq jáne mádenıet salasyndaǵy qyzmetter 16%-ǵa qymbattady. Shashtaraz jáne jeke qyzmet kórsetý mekemeleri qyzmetterine baǵany 20%-ǵa ósirgen.

Buǵan deıin Imantaý-Shalqar demalys aımaǵyna kelgen týrıster sany úsh jylda eki ese artqanyn jazǵan edik.