SQO-da bir jylda jaraqat alyp aýrýhanaǵa qaralǵan balalar sany 800-ge artty

Soltústik Qazaqstan oblystyq kópbeıindi balalar aýrýhanasyna jyl basynan beri jaraqat alǵan 9212 bala qaralǵan, olardyń basym bóligi 15-18 jastaǵylar, dep habarlaıdy Kazinform.

SQO kópbeıindi balalar aýrýhanasy jaraqat bólimshesiniń meńgerýshisi Asylhan Jaǵyparovtyń aıtýynsha, jaraqattanýshy balalar jyl saıyn azaıýdyń ornyna kerisinshe kóbeıgen.

Sońǵy ýaqytta samokattan qulap, jaraqat alǵan bala sany artqan. Máselen táýligine on bala dáriger kómegine júginse, sonyń úsheýi samokattan mertikken.

• Balalar demalysta, ásirese jazǵy kanıkýl kezinde kóp jaraqattanady, olar negizinen aýyr jaraqattar jáne jastary 15-18-de. Eresek bolǵandyqtan samokat, moped, mototsıklge minip, jol-kólik apatyna túsip jatady. Bas súıekterin, omyrtqasyn zaqymdaıdy, qol-aıaǵyn syndyrady.

Máselen bıyl jazda balalar zardap shekken 4-5 jol-kólik apaty boldy. Jeńil kólik Kamazǵa soǵylyp, saldarynan ul balanyń aıaǵy synsa, qyz balanyń bet terisi jyrtylyp, bas-bet súıegi, ıyǵy, san súıegi synyp, aýyr jaraqat aldy. Búginde ol qyz bala tolyq em alyp, úıine jiberildi. Syrqat Shymkent qalasynyń turǵyny, kespeı-aq ota jasap, metallkonstrýktsııa ornattyq. Búginde ońaltýdan ótip, aıaǵyna turdy, ózi júre alady, ıaǵnı qol-aıaǵynyń fýnktsııasy qalpyna keldi. Biz úshin bul óte jaqsy, - deıdi Asylhan Jaǵyparov.

Dárigerdiń aıtýynsha, bıyl birneshe bala bıiktikten qulaǵan. Mamandar olardyń da ómirine arasha túsip, jandaryn saqtap qaldy. Jalpy, bıyl jaraqat bólimshesinde ólim-jitim tirkelmegen.

• Sońǵy on jylda oblystyq kópbeıindi aýrýhanada hırýrgııalyq kómek jaraqat alǵan balalarǵa, sonyń ishinde qoldary-aıaqtary synǵan balalarǵa óte jaqsy uıymdastyrylǵan. Qazir burynǵy 80-90 jylǵy tásilder emes, zamanaýı ádister qoldanylady, sonyń ishinde burynǵydaı kespeı ota jasalady. Nátıjesinde bala psıhologııasyna keri áser etetin jaıt - aýrýhanada jatý uzaqtyǵy azaıdy, burynǵydaı 20-30 kún emes, 5-6 kúnde úılerine ketedi, - deıdi Asylhan Jaǵyparov.

Mamannyń aıtýynsha, byltyr jaraqatpen kelgen 8410 balaǵa kómek kórsetildi, sonyń 606-sy jaraqat bólimine jatqyzylyp, ota jasaldy.

Bıyl oblystyq kópbeıindi balalar aýrýhanasyna 9212 bala jaraqat alyp kelse, sonyń 665-ine ota jasaldy.