SQO-da bir jylda onkologııalyq esepte turǵandar sany 600 adamǵa artty
PETROPAVL. KAZINFORM – Soltústik Qazaqstan oblysynda onkologııalyq aýrýlar boıynsha 12 myńǵa jýyq adam dıspanserlik esepte tur.
Bir jylda syrqattanǵandar sany shamamen 600 adamǵa kóbeıgen. Naýqastardyń dárigerge aýrýdyń sońǵy satysynda ǵana júginýi jaǵdaıdy qıyndatqan. Bul týraly SQO onkologııalyq ortalyqta ótken jıynda aıtyldy.
Onkologııalyq ortalyqtyń meńgerýshisi Jiger Dúısenovtiń aıtýynsha, óńirde qaterli isikke shaldyǵý kórsetkishi 100 myń turǵynǵa shaqqanda 296,1 promılle, bir jylda syrqattanǵandar sany 12,6% ósken. Aýrýdan qaıtys bolǵandar sany da artqan.
Dárigerler, ásirese, ókpe qaterli isiginiń kesh anyqtalatynyn aıtady. Qazir osy dıagnozben óńirde 501 adam dıspanserlik esepte tur. Jyl basynan beri 199 jańa jaǵdaı tirkelgen. Onyń 44-inde aýrý tórtinshi satysynda, 70-ten astam naýqasta úshinshi satysynda anyqtalǵan. Byltyr obyrdan 102 adam kóz jumsa, bıyl on aıda bul dertten 93 adam qaıtys boldy.
Onkologtardyń aıtýynsha, ókpe qaterli isigine kóbine temeki shegý ákeledi. Mamandar aýrýdyń aldyn alý úshin zııandy ádetten bas tartýǵa, sondaı-aq profılaktıkalyq tekserýlerden ýaqytyly ótýge keńes beredi. Ásirese zııandy óndiris oryndarynda eńbek etetin adamdardyń densaýlyǵyna muqııat bolǵany jón.
Uıqybez qaterli isigi de dárigerler úshin kúrdeli máselege aınalyp otyr. Bul aýrý taralý jıiligi boıynsha toǵyzynshy orynda bolǵanymen, onkologııalyq dertterden bolatyn ólim-jitim kórsetkishinde besinshi orynǵa shyqqan. Óńirde jyl saıyn shamamen 50 jaǵdaı tirkeledi. Byltyr 31 adam, bıyl 27 adam kóz jumdy. Qazir dárigerler esebine 58 adam alynǵan.
- Uıqybez qaterli isiginiń damý qaýpin arttyratyn faktorlarǵa qant dıabeti, semizdik, qozǵalystyń azdyǵy, temeki shegý jáne sozylmaly pankreatıt jatady. Al bul aǵzaǵa jasalatyn operatsııalar hırýrgııadaǵy eń kúrdeli otalardyń qataryna kiredi. Mundaı dıagnoz qoıylǵan naýqastarǵa jylyna 10 shaqty operatsııa jasalady. Soǵan qaramastan, em qabyldaǵannan keıingi bes jyldyq ómir súrý kórsetkishi 10% aspaıdy, - deıdi hırýrgııalyq bólimshe meńgerýshisi Málik Seksembaev.
Al, qýyq asty bezi obyry byltyr 76 adamda anyqtalyp, 23 naýqas qaıtys bolǵan. Bıyl 83 adam aýyryp, jyl basynan 18 syrqat kóz jumdy. Qazirgi ýaqytta óńirde qýyqasty bezi qaterli isigi dıagnozymen 509 adam dıspanserlik esepte tur.
Mamandar aýrýdy erte anyqtaýdyń mańyzyn atap ótti. Onkologııalyq ortalyq mamandarynyń aıtýynsha, munda jaqynda saraptamalyq endoskopııa ortalyǵy ashyldy. Onda joǵary dáldiktegi dıagnostıkalyq zertteýlermen qatar, ishki aǵzalarǵa az ınvazıvti hırýrgııalyq otalar jasalady. Ortalyqta jańa magnıtti-rezonanstyq tomografııa apparaty men zamanaýı sáýlelik terapııa jabdyqtary da bar.
Onkologııalyq ortalyqta jyl boıy túrli aýrýlardyń aldyn alý jáne erte dıagnostıkalaýǵa arnalǵan ashyq esik kúnderi uıymdastyrylady. Kelýshiler tegin tekserýden óte alady. Kelesi ashyq esik kúni 21 qarashada ótedi. Bul joly mamandar uıqybez qaterli isiginiń aldyn alý men ony erte anyqtaý máselesine nazar aýdarmaq.
Buǵan deıin qaterli isikke qarsy otandyq dári naryqqa qashan shyǵatynyn jazǵan edik.