SQO-da bir jylda aty-jóni joq 51 kóshege ataý berildi

PETROPAVL. KAZINFORM — Soltústik Qazaqstan oblysynda ıdeologııalyq turǵydan eskirgen, aýystyrýdy qajet etetin 33 aýyl jáne 300-den astam kóshe jáne 13 aýyldyq okrýg ataýy bar.

Olardyń qatarynda Kýıbyshev, Kırov, Lenın aýyldyq okrýgteri, Býdennoe, Chapaevo, Krasnyı Oktıabr, Komsomolets sııaqty eldi mekender, sondaı-aq Lenın, Komsomol, Karl Marks, Sovhoznyı, Sovetskıı, Oktıabrskaıa, Kalının, Pıonerskaıa, Kommýnıstıcheskaıa, Komsomolskaıa, Kırov, Kýıbyshev sekildi kóshe ataýlary kezdesedi.

Óńirde Qazaqstan tarıhyna esh qatysy joq, mán-maǵynasy túsiniksiz eldi meken ataýlary da bar. Novodvorovka, Dashka-Nıkolaevka, Bahmýt, Chermoshnıanka, Chernıgovskoe, Kremenchýg, Kellerovka, Obýhovka, Ivan-Gorod, Beloıarka, Bolshoı Izıým, Razgýlnoe, ıAlty, Sımonovka, Knıazevka, Rýhlovka, Tahtabrod, Sazonovka syndy ataýlar osy sanatqa jatady.

SQO mádenıet, tilderdi damytý jáne arhıv isi basqarmasynyń málimetinshe, bul baǵytta jumys atqarylyp jatyr.

— Memleket basshysynyń Ulttyq quryltaıdyń II jáne IV otyrystarynda bergen tapsyrmasyna sáıkes oblysta onomastıka salasyn júıeleý baǵytynda keshendi ári josparly jumys atqarylyp keledi. Negizgi maqsat — ıdeologııalyq turǵydan eskirgen, tarıhı jáne ulttyq mazmunǵa saı kelmeıtin eldi mekender men kóshelerdiń ataýlaryn retke keltirý. Osyǵan baılanysty 2022 jyldan beri «Jerińniń aty — elińniń haty» is-sharalar kesheni iske asyp jatyr. Atalǵan joba aıasynda oblystyń barlyq aýdanynda jáne oblys ortalyǵynda «Onomastıkalyq keńistikti retteý joldary» taqyrybynda jyl saıyn 25 kezdesý ótkizilip, bul jumysqa tanymal qoǵam jáne memleket qaıratkerleri tartylǵan, — deıdi basqarma basshysy Dosbol Ábdireıisov.

Basqarmanyń málimetinshe, 2020–2025 jyldar aralyǵynda oblysta 3 aýyldyq okrýg pen 6 aýyldyń ataýy ózgertilgen. Atap aıtqanda, Krıvoşekov aýyldyq okrýgi — Araı, Lenın aýyldyq okrýgi — Bıke, Novosel aýyldyq okrýgi — Úlken Qaraoı dep qaıta ataldy.

Al Krıvoşekov, Voskresenovka, Karasevka, Lenın, Kıevskoe, Kommýnızm aýyldaryna tarıhı ári ulttyq mazmundaǵy jańa ataýlar berildi. 

Sonymen qatar osy kezeńde óńir boıynsha 281 kóshe ataýy jańartyldy.

— Qazirgi ýaqytta Mádenıet jáne aqparat mınıstrliginiń tapsyrmasyna sáıkes eldi mekenderdi qaıta ataý ýaqytsha toqtatylǵan. Osyǵan qaramastan, ataýy joq kóshelerge ataý berý jumysy jalǵasyp jatyr. Bul jedel járdem, órt sóndirý, polıtsııa sekildi jedel qyzmetterdiń jumysyn jeńildetý úshin asa mańyzdy. 2025 jylǵa arnalǵan Jol kartasy aıasynda oblys boıynsha 51 ataýy joq kóshe qamtyldy. Sonyń ishinde Maǵjan Jumabaev aýdanyndaǵy 15 kóshege ataý berý máselesi oblystyq onomastıka komıssııasynda oń sheshimin tapty. Qazirgi ýaqytta aýyldyq okrýg ákimderi zańnamaǵa sáıkes rásimdeý jumystaryn júrgizip jatyr, — deıdi Dosbol Ábdireıisov. 

Máselen Jeńistiń 80 jyldyǵyna oraı ataýy joq kóshelerge batyrlardyń esimi berildi. Qyzyljar aýdanynda bir kóshege Talǵat Bıgeldınovtyń, al Ýálıhanov aýdanynda eki kóshege Mánshúk Mámetova men Álııa Moldaǵulovanyń esimin berý jóninde sheshim qabyldandy.

Sonymen qatar Petropavldaǵy jańa «Birlik» jáne «Orman» shaǵyn aýdandaryndaǵy ataýy joq kóshelerge ataý berý máseleleri qoǵamdyq tyńdaýlarda qaralyp, turǵyndar tarapynan qoldaý tapty.

Esterińizge salaıyq, Almatyda 156 kóshege jańa ataý beriletinin jazǵan edik.