SQO-da bir jyl ishinde kartop baǵasy kóp ózgergen

PETROPAVL. KAZINFORM — Soltústik Qazaqstan oblysynda aqpanda ınflıatsııa jyldyq esepteýmen alǵanda 10 paıyzǵa jetti.

Ulttyq statıstıka bıýrosynyń SQO boıynsha departamentiniń málimetinshe, baǵalar bıylǵy aqpanda, ótken jylǵy aqpanmen salystyrǵanda, azyq-túlik taýarlaryna — 7%, azyq-túlik emes taýarlarǵa — 11, aqyly qyzmetterge 14% ósti. 

Osy aralyqta kúnbaǵys maıyna baǵa 20,5%, sıyr etine — 19, kondıter ónimderine — 14,5, tuzdalmaǵan sary maıǵa — 14, balyq jáne teńiz ónimderine — 12, nanǵa — 10,5, alkogolsiz sýsyndarǵa — 10, qus etine — 9, alkogoldik ishimdikterge — 9, shujyqtarǵa — 4, qantqa 3% kóterilgen. Jas kókónister baǵasy 18% ósti, sonyń ishinde kartop — 54%, pııaz — 38, qyryqqabat — 32, qııar — 22, qyzanaq — 13, qyzylsha 4% qymbattaǵan. Al sábiz, kerisinshe, 8% arzandap otyr.

Baǵalar aýdıo-kózben sholý jabdyqtary men fotoapparatýraǵa, aqparatty óńdeýge arnalǵan jabdyqqa — 44%, kıim jáne aıaq kıimge — 10,5, jeke bas tutynýyna arnalǵan taýarlar men prıborlarǵa — 9, jýý jáne tazalaý quraldaryna — 6,5, turmystyq prıborlarǵa 1% ósti. Ballondaǵy suıytylǵan gaz da qymbattap, bir jyl ishinde 26%, tas kómirge — 15,5, benzınge 2% ózgerdi.

Kommýnaldyq qyzmetterdiń tarıfinde de ózgeris bar. Ystyq sýǵa — 83%, sýmen jabdyqtaýǵa — 63, ortalyqtan jylytýǵa 42% baǵa kóterildi.

Ambýlatorlyq qyzmetter — 13%, qoǵamdyq tamaqtandyrý qyzmetteri — 13, shashtaraz jáne ásemdik salondary qyzmetteri 20% qymbattady.

Kólik qyzmetteriniń quny 10% kóterildi, sonyń ishinde temirjol jolaýshylar kóliginiń quny — 20%, avtomobıl jolaýshylar kóliginiń quny — 4% ósti.

Buǵan deıin Petropavlda kartoptyń shekteýsiz satylyp jatqanyn jazǵan edik.