SQO-da bir jyl ishinde áıelin eki ret balaǵattaǵan er adam qamaýǵa alyndy

PETROPAVL. KAZINFORM – Soltústik Qazaqstan oblysynda áıelin balaǵattaǵan er adam 10 táýlikke qamaldy.

SQO sotynyń málimetinshe, ákimshilik quqyq buzýshylyq týraly isti Qyzyljar aýdandyq soty qarady. S. áıelin buǵan deıin de boqtap, jaman sózder aıtqan. Sol úshin jazasyn tartqan. Alaıda bir jyl ótpeı jatyp, er adam úıinde otyryp, áıeline taǵy aýyr sózder aıtyp, janjal shyǵarǵan.

Tergeý barysynda S. óz kinásin moıyndap, áıelimen sózge kelip qalǵanyn, ashýǵa býlyǵyp, balaǵat sóz aıtqanyn túsindirdi.

Sotta onyń kinási tergeý materıaldary, ákimshilik hattama men burynǵy jazalaryna qatysty derektermen tolyq dáleldendi. Osylaısha sot ony QR Ákimshilik quqyq buzýshylyq týraly kodekstiń 73-baby 2-bólimi boıynsha kináli dep tanyp, 10 táýlikke ákimshilik qamaýǵa alý jazasyn kesti. Sonymen qatar oǵan alkogoldi ishimdik, esirtki men psıhotroptyq zattardy qoldanýǵa tyıym salyndy.

Buǵan deıin bankrot bolyp jabylǵan Petropavl áýejaıynyń qazirgi jaı-kúıi týraly jazǵan edik.