SQO-da bir jazda 300-den astam tarıhı-etnografııalyq eskertkish tabyldy
Soltústik Qazaqstan oblysynda bıyl «Mádenı-tarıhı úrdis kontekstindegi Soltústik Qazaqstan: tas dáýirinen bastap qazirgi zamanǵy etnografııaǵa deıin» atty joba bastaldy. Nátıjesinde óńirde bir jazda 300-den astam tarıhı-etnografııalyq eskertkish ashyldy, dep habarlaıdy Kazinform.
Bıyl Álkeı Marǵulan atyndaǵy arheologııa ınstıtýtynyń bastamasymen SQO-nyń tas dáýirinen bastap osy zamanǵy etnografııa eskertkishterin anyqtaý maqsatynda baǵdarlama qolǵa alyndy.
Tarıhshy-arheologtar jaz aılarynda óńirdiń 7 aýdanynda — Esil, Shal aqyn, Tımırıazev, Aıyrtaý, Jambyl, Mamlıýt jáne Músirepov atyndaǵy aýdandarda jumys istedi.
11 arheologııalyq otrıad quryldy. Mamandar Qostanaı jáne Pavlodar oblystaryn da qamtydy.
Jınalǵan materıal negizinde SQO-nyń arheologııalyq katalogy jasalmaq.
«Bıyl Petropavldyń batysynda jatqan Qostanaıǵa jaqyn aýdandardy zerttedik. Keler jyly shyǵystaǵy, Pavlodarmen shektesetin aýdandardy aralaımyz. Arheologııa ınstıtýty, jergilikti atqarýshy bılik, M.Qozybaev ýnıversıteti, oblystyq tarıhı-ólketaný mýzeıi birlese jumys atqardy. SQO-nyń ýnıversıtetimen áriptestik ornaǵan. Sondyqtan jumystarǵa joǵarý oqy ornynyń tarıh fakýltetiniń stýdentteri tartyldy. Jalpy, bir otrıadta atqaratyn jumystaryna oraı onnan on bes adamǵa deıin boldy. Máselen qazba jumystaryna jastardy kóbirek tarttyq», — deıdi Á.H. Marǵulan atyndaǵy arheologııa ınstıtýtynyń jetekshi ǵylymı qyzmetkeri Darhan Baıtileý.
Baǵdarlama eki jylǵa shaqtalǵanymen jumys toqtamaıdy. Nátıje shyqqansha deıin 5-10 jylǵa deıin sozylýy múmkin.
«Negizgi maqsatymyz arheologııalyq barlaý bolatyn. Jeti aýdanda jumys júrgizdik. 300-den asa eskertkish taptyq. Onyń basym bóligi — 18-19 ǵasyrǵa jatatyn etnografııalyq eskertkishter, ıaǵnı qystaýlar. Tas, qola dáýiriniń qonystary tabyldy. Erte temir dáýiri eskertkishteri oba-qorym retinde saqtalǵan. Ár aýdannyń óz erekshelikteri bar, sonyń biri — tabıǵatqa, klımatqa baılanysty. Úlken qorymdar saqtalmaǵan, kóbi jyrtylyp, ornyna egin salynǵan. Úlken obalar bar, buzylmaı bútin tur. Qonystardy, sonyń ishinde turǵyn úı-jaılaryn izdedik. Olar da nashar saqtalǵan. Kezinde Keńes zamanynda kolhoz-sovhoz bolǵanda buzyp, jermen-jeksen qylǵan. Bir jaqsysy qazaq etnografııalyq eskertkishteri kóp saqtalǵan eken. Biz olardy zerttedik, koordınattary alyndy. Dronmen túsirdik. Kelesi jyly eskertkishter jınaǵyn shyǵarý josparda tur. Ár aýdannyń eskertkishter jınaǵyn shyǵarmaq nıettemiz», — deıdi Á.H. Marǵulan atyndaǵy Arheologııa ınstıtýtynyń jetekshi ǵylymı qyzmetkeri Janbolat Ótebaev.
