SQO-da bir shańyraqtyń 20 shaqty adamy referendým ýchaskesine án-kúıletip keldi
PETROPAVL. KAZINFORM – Soltústik Qazaqstan oblysy Qyzyljar aýdany Báıterek aýylyndaǵy Musabaı Juparhannyń otbasy referendým ýchaskesine taıly-tuıaǵy qalmaı keldi. Ulttyq kıim kıgen áýlet músheleri tańdaý jasap bolǵannan keıin, kelýshilerge dombyra tartyp, án oryndap berdi.
Báıterek aýylynyń turǵyny Musabaı Juparhan Qazaqstanǵa 2009 jyly qonys aýdarǵan. Mońǵolııadan kelgen qandasqa «Nurly jol» baǵdarlamasymen salynǵan úı berildi. Qazir atajurtta dúnıege kelgen nemereleriniń qyzyǵyn kórip otyr.
«Tórt ul, eki qyzym bar, bári búginde shańyraq kótergen. Kenje ulym Juparhanmen birge turamyn. Osyndaǵy mektepte 6 jyl jumys istep, byltyr zeınet demalysyna shyqtym», - deıdi aýyl turǵyny.
Zeınetker de, bala-shaǵasy da jergilikti mektepte ornalasqan referendým ýchaskesine ulttyq kıimmen jáne dombyra ala keldi. Án shyrqap, daýys berýge kelgen aýyldastarynyń kóńilin kóterdi.
«Áıelim, balalarym men kelinderim, nemerelerim – tańdaý jasaýǵa keldik. Referendýmǵa qatysyp, óte mańyzdy máselege qatysty daýysymyzdy berdik. Elimizdiń bolashaǵy úshin durys tańdaý jasadyq dep úmittenemin», - deıdi Musabaı Juparhan.
Qyzyljar aýdany Báıterek aýylyndaǵy №276 referendým ýchaskesinde 988 adam tirkelgen. Olardyń basym bóligi túske deıin óz tańdaýlaryn jasady.
Buǵan deıin Petropavldaǵy QR Ulttyq ulany akademııasyndaǵy referendým ýchaskesi alǵashqylardyń biri bolyp jumysyn aıaqtaǵanyn jazǵan edik.
