SQO-da bir kúnde maldy qaraýsyz jiberýdiń 26 faktisi anyqtaldy
PETROPAVL. KAZINFORM — Soltústik Qazaqstan oblysynda «Mal urlyǵy» respýblıkalyq jedel-profılaktıkalyq is-sharasy aıasynda reıdter bastaldy.
SQO Polıtsııa departamenti baspasóz qyzmetiniń málimetinshe, alǵashqy kúni polıtseıler veterınarııalyq baqylaý mamandarymen birlesip 127 avtokólikti, mal jáne et ónimderin ótkizetin 34 oryndy, 87 sharýa qojalyǵyn, jaıylymdyq oryndar men fermalardy tekserdi. Nátıjesinde veterınarııa zańnamasyn buzýdyń 6 deregi anyqtaldy.
Sonymen qatar maldy qaraýsyz jiberýdiń 26 faktisi tirkelip, ıeleri ákimshilik jaýapkershilikke tartyldy.
—Maldy baqylaýsyz jiberý qylmyskerlerge qolaıly. Qazir Esil aýdanynyń polıtsııa bólimi 25 jylqynyń joǵalýyna qatysty tekserý júrgizip jatyr. Qaraýsyz júrgen jylqylar jaıylymnan joǵalǵan, ıesi túliktiń naqty qashan joǵalǵanyn aıta almady. Polıtsııaǵa birden júginbegendikten iz jaýǵan astynda qalyp, jumysty qıyndatty, — deıdi polıtseıler.
Aqqaıyń aýdanynda reıd barysynda polıtseıler 49 jastaǵy aýyl turǵynynan tirkelmegen «IJ-27» tegis uńǵyly myltyǵyn tárkiledi. Qarý sharýashylyq qurylysta saqtalǵan. Er adam ony ótken jyldyń qazan aıynda ormannan taýyp alǵanyn aıtqan. Qarý saraptamaǵa jiberildi, soǵan sáıkes ákimshilik jaýapkershilikke tartý-tarpaý belgili bolady.
SQO PD patrýldik polıtsııa batalonynyń ınspektorlary mal urlyǵynyń jolyn kesý maqsatynda jeke jospar boıynsha jumys istep jatyr. Aýdandardan et ónimderi qala bazarlaryna negizinen túngi jáne tańǵy ýaqytta jetkiziletindikten, negizgi avtojoldarda baqylaý kúsheıtildi. Tekserýler krımınaldyq polıtsııa qyzmetkerleri jáne veterınarııalyq baqylaý mamandarymen birlesip júrgizilip jatyr.
Buǵan deıin Atyraý oblysynda mal urlyǵyna qarsy blokbeketter qoıylǵanyn jazǵan edik.