SQO-da bir kezderi túrme ornalasqan aýyl quryp barady — fotoreportaj
PETROPAVL. KAZINFORM — Soltústik Qazaqstan oblysyndaǵy bir kezderi aty dúrildep turǵan Gornoe eldi mekeni quryp barady. Bul aýylda ákki qylmyskerler, qanypezerler men baýkespe urylar otyrǵan kolonııa bolǵan edi.
SQO boıynsha qylmystyq-atqarý júıesi departamentiniń ES-164/4 mekemesi dep atalǵan bul kolonııa 60 jylǵa jýyq ýaqyt jumys istep, 2018 jyly jabyldy. Gornoe eldi mekeniniń janynda ornalasqan nysannyń keı ǵımarattarynyń búginde qabyrǵasy sógile bastaǵan.
Jol boıynda ornalasqan ań-janýarlardyń músinderine ótken-ketken toqtap, sýretke túsetin.
Bul — jazasyn óteýshilerden qalǵan belgi. Olar da búginde jel men jańbyrǵa mújilip, syıqy ketip tur.
Aqbaıan Shoqybaeva birneshe jyl aýylda feldsher bolyp jumys istedi, qazir zeınetker.
Taýdyń eteginde ornalasqan, tabıǵaty kórkem eldi mekennen kóshkisi joq. Biraq, munda jaıly turmysqa jaǵdaı jasalmaǵan.
— Balalarym ár senbi saıyn aýylǵa kelip, aýnap-qýnap ketetin. Qazir anda-sanda bir keledi. Óıtkeni aýylǵa kelse syrtpen baılanys úziledi. Telefonmen sóılesý muń, almaıdy. Aýyldyń óz ereksheligi bar, árıne. Tastyń ústinde turmyz. Sondyqtan kartop, qııar-sábiz durys óse qoımaıdy. Bárin satyp alamyz. Mal ustaýǵa da qıyn. Jumys bolmaǵasyn qazir jastar da qalmaǵan, — deıdi aýyl turǵyny.
Gornoe aýylynda qazir bir dúken jáne eki aýyldyń turǵyndaryna arnalǵan «Dostyq» demalys ortalyǵy bar.
Eki jyl buryn bala sanynyń azdyǵynan negizgi mektep jabylyp qalǵan. Qazir bastaýysh mektep qana jumys istep tur.
— 1-2-3 synyp oqýshylaryn bir kabınetke otyrǵyzyp oqytyp jatyrmyz. 4-synypta oqýshy joq. Menen basqa kelip-ketip isteıtin aǵylshyn tili pániniń muǵalimi bar jáne mektepti kútip ustaıtyn tehpersonal jumys isteıdi. Biz sııaqty jastar aýylda qalmady. Qazir negizinen munda zeınetkerler turady, — deıdi mektep meńgerýshisiniń mindetin atqarýshy Amıla Tashmanova.
Esil aýdany Zagradovka aýyldyq okrýginiń málimetinshe, 2021 jyly qarasha aıynda burynǵy kolonııanyń barlyq dúnıe-múlki elektrondy saýda arqyly satyldy.
Qazirgi ıesi — «Iıýn 17» JShS. Bul seriktestik kolonııa janynan qurylysqa qajet tasty óndirýmen aınalysady.
Gornoe eldi mekeniniń halqy da 2018 jyldan beri úsh ese qysqarǵan.
— 2018 jyly bul aýylda 86 úı, 346 adam bolsa, qazir 33 úı jáne 100 turǵyn ǵana qalǵan. Halyq sany jyldan jylǵa azaıyp keledi. Oqýshy sanynyń azdyǵynan aýyldaǵy bastaýysh mektep jabylyp qalýdyń az-aq aldynda tur. Turǵyndar jumystyń joqtyǵynan kóship jatyr. Eldi mekende tek tas óńdeýmen jáne qoı sharýashylyǵymen ǵana aınalysýǵa bolady. Sondyqtan qandastardy da kóshirip ákelý tıimsiz, — deıdi Zagradovka aýyldyq okrýginiń ákimi Danııar Tuıaqov.
Buǵan deıin SQO-nyń qaı aýyldaryna bıyl taza sý jetetinin jazǵan edik.
