SQO-da bir aıda malyn qaraýsyz jibergen 114 adamǵa aıyppul salyndy
PETROPAVL. KAZINFORM – Soltústik Qazaqstan oblysynda mal urlyǵymen kúresý maqsatynda túligin erkin jaıylymǵa jibergender jazalanyp jatyr.
SQO polıtsııa departamenti baspasóz qyzmetiniń málimetinshe, óńirde shamamen 900 myń bas tórt túlik bar. Mal men et ónimderin baqylaýsyz tasymaldaý jáne satý mal urlyǵynyń jasalýyna qolaıly jaǵdaı týǵyzady. Onyń aldyn alý maqsatynda oblysta 10–12 aqpan aralyǵynda «Mal urlyǵy» jedel-profılaktıkalyq is-sharasy ótkizilip jatyr.
Aktsııa aıasynda polıtsııa qyzmetkerleri veterınarııalyq qyzmet ókilderimen birlesip, mal satý jáne soıý oryndarynda tekserýler júrgizedi, avtokólikterdi toqtatyp, qujattardyń zańdylyǵyn qadaǵalaıdy. Sonymen qatar sharýashylyqtar, fermerlik qojalyqtar men jaıylymdyq oryndar erekshe baqylaýǵa alyndy.
Oblystyń shekaralas aýdandarynda mal men et ónimderin memlekettik shekara arqyly zańsyz ótkizýdiń jolyn kesý maqsatynda kórshiles memleketterdiń ýákiletti organdarymen ózara is-qımyl uıymdastyrylǵan.
Sondaı-aq tártip saqshylary aýyl turǵyndaryn óz múlkin qorǵap, maldy qaraýsyz, erkin jaıylymǵa jibermeý qajettigin eskertti. Bos júrgen mal urylarǵa oǵaı olja. Qańtar aıynda óńirde júrgizilgen profılaktıkalyq jumys nátıjesinde 114 mal ıesi túligin qaraýsyz jibergeni úshin ákimshilik jaýapkershilikke tartyldy.
Buǵan deıin Pavlodar oblysynda mal urlyǵymen aınalysqan qylmystyq top ustalǵanyn jazǵan edik.
