SQO-da bir aı ishinde JRVI juqtyrǵan 11200 adam dárigerge qaralǵan

Soltústik Qazaqstan oblysynda jańa epıdemıologııalyq maýsym bastalǵaly 11 230 adam jedel respıratorly vırýstyq ınfektsııa juqtyryp, dárigerlerge qaraldy, dep habarlaıdy Kazinform.

Óńirlik kommýnıkatsııalar qyzmetinde SQO sanıtarııalyq-epıdemıologııalyq baqylaý departamenti oblystaǵy epıdemıologııalyq jaǵdaı boıynsha aqparat berdi. Vedomstvo basshysy Áset Jumataevtiń aıtýynsha, JRVI juqtyrý sońǵy aptada 17 % artqan.
Eń kóp aýyrǵandar - 14 jasqa deıingi balalar, 2771 jaǵdaı nemese 70 %. Ázirge tumaý juqtyrǵandar joq.

«Oblysqa reseılik «Grıppol plıýs» vaktsınasynyń 60 myń dozasy satyp alyndy. Búgingi kúni 42 myń adamǵa tumaýǵa qarsy vaktsına egildi. Onyń 7687 medıtsına qyzmetkeri, 4333 oqýshy, 296 júkti áıel, 20 myńnan astamy sozylmaly aýrýy bar adam.

SQO boıynsha «Ulttyq saraptama ortalyǵy» fılıalynyń vırýsologııalyq zerthanasynda tumaýǵa zerthanalyq dıagnostıka júrgiziledi. 1 qazannan bastap polımerazdy tizbekti reaktsııa ádisimen tumaýǵa shaldyqqandardy anyqtaý úshin 283 synama zertteldi, tumaý vırýsy tabylǵan joq.

Búgingi kúni oblys aýmaǵynda tumaýsyz vırýstar basym, 18 synama oń kórsetti, onyń ishinde: SARS-CoV-2 – 6, rınovırýs – 6, adenovırýs – 5 jáne bireýi - metapnevmovırýs», - deıdi Áset Jumataev.

Mamannyń aıtýynsha, tumaýǵa qarsy vaktsınatsııadan basqa, spetsıfıkalyq emes profılaktıkany da nazardan tys qaldyrmaý kerek, ıaǵnı: adamdar kóp jınalatyn jerlerde jáne qoǵamdyq kólikterde maska kııý, aýrýdyń belgileri bar adamdarmen tyǵyz baılanysta bolýdan aýlaq bolý.

Koronavırýsqa qatysty jaǵdaı turaqty, ótken aptada eki adamǵa osy dıagnoz qoıyldy.