SQO-da «Bir aýyl – bir ónim» baǵdarlamasy boıynsha tórt jeńimpaz anyqtaldy
PETROPAVL. KAZINFORM – Soltústik Qazaqstan oblysynda «Bir aýyl – bir ónim» baǵdarlamasynyń óńirlik brend komıtetiniń otyrysy ótti. Nátıjesinde tórt kásipker jeńimpaz dep tanyldy. Endi olar túrli qoldaýǵa ıe bolmaq.
SQO kásipkerler palatasy baspasóz qyzmetiniń málimetinshe, bıyl «Bir aýyl — bir ónim» baǵdarlamasyna qatysýǵa óńirden 24 ótinish túsken.
«Qatysýǵa ótinish bergen kásipkerler óz ónimderin 29 tamyzda Petropavlda ótken kórme-jármeńkede kópshilik nazaryna usyndy. Kórme qorytyndysy boıynsha konkýrstyń kelesi kezeńine 10 fınalıst ótti, olar keıin óz jobalaryn óńirlik brend-komıtet aldynda qorǵady. Nátıjesinde onnyń úsheýi kelmeı, aqtyq kezeńge ótken 7 kásipker óz ónimderin usyndy», — dedi SQO Kásipkerler palatasynyń dırektory Esjan Orazalın.
Qazylar alqasy qurt, ara sharýashylyǵy ónimderi, kir sabyn, júnnen jasalǵan buıymdar, eshki sútinen jasalǵan ónimder, tosap pen djem, kondıter ónimderin pisirý jáne konservileý sııaqty taýarlardyń arasynan úzdikterdi anyqtady.
Brend-komıtettiń sheshimimen kir sabyn jasaıtyn «Bereke» JK, qurt jasaıtyn «Doshodjaev» JK, tosap-djem qaınatatyn «Arýjan» JK jáne eshki sútinen túrli ónim daıyndaıtyn «Tamasha» JShS jeńimpaz atandy.
«Jeńimpazdardy tańdaý kezinde birinshi kezekte kásipkerlerdiń ónim nemese taýar óndirisinde tek jergilikti shıkizat pen qol eńbegin paıdalanýyna basa nazar aýdaryldy. Sondaı-aq, kásiptiń áleýeti, onyń qaptamasy, taýardyń aımaqtyq erekshelikteri jáne onyń ishki jáne syrtqy naryqtarǵa shyǵý múmkindigi bar-joǵy baǵalandy. Sondaı-aq óndirýshiniń daıyndyǵy — onyń óz tutynýshylarynyń, tájirıbesi men jumysshylarynyń bolýy jáne t. b. eskerildi», — deıdi Esjan Orazalın.
Baǵdarlamanyń negizgi maqsaty — jergilikti ónimniń sapasyn arttyrý, jergilikti brendterdi qurý, marketıng jáne naryqtaǵy ónimniń qundylyǵyn arttyrý.
Endi joba jeńimpazdaryna marketologtar óz ónim-taýarlaryn odan ári jetildirip, brendteý, sertıfıkattaý jáne eksportqa shyǵarý boıynsha kómek kórsetedi.
Buǵan deıin SQO-da otandyq ónimdi óńdeý jáne Qytaıǵa eksporttaý boıynsha eń iri ortalyq qurylyp jatqanyn jazǵan edik.
