SQO-da bir aptada «gonkong tumaýyn» 50 shaqty adam juqtyrdy

PETROPAVL. KAZINFORM — Soltústik Qazaqstan oblysynda JRVI juqtyrǵandar sany tómendegenimen, tumaýmen aýyrǵandar kóbeıdi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, epıdmaýsym bastalǵaly 33 768 adam dárigerge kórinip, olarǵa JRVI dıagnozy qoıyldy. Bul ótken jyldyń deńgeıinde. Aýyrǵandardyń 68% — 14 jasqa deıingi balalar.

— Ótken bir aptada 2600-ge jýyq adam JRVI-men aýyrdy. Bul onyń aldyndaǵy aptadan 1,3 ese nemese 32% tómen. Qarasha aıynyń basynan tumaý juqtyrýdyń zerthanalyq rastalǵan 173 jaǵdaıy tirkeldi. Bul — A/H3N2 tumaýy. Budan bólek tumaýǵa jatpaıtyn vırýstar da aınalymda júr. Onyń ishinde rınovırýstar, bokavırýstar jáne adenovırýstar bar. Barlyǵy 22 jaǵdaı anyqtaldy, — deıdi sanıtar dárigerler.

Mamandar ózdiginen úıde emdelýdiń qaýipti ekenin eskertedi, asqynǵan jaǵdaıda ókpeniń qabynýyna ákelýi múmkin. Sondyqtan dene qyzýy kóterilip, muryn bitelse, tamaq aýyryp, ózińizdi álsiz sezinseńiz birden dárigerge kóringen jón. 

Buǵan deıin SQO-da 16 synyp JRVI-ge baılanysty qashyqtan oqyp jatqanyn jazǵan edik.