SQO-da bir aptada 3 myń adam JRVI juqtyrdy

PETROPAVL. KAZINFORM — Soltústik Qazaqstan oblysynda osy epıdemıologııalyq maýsymda 58 myńǵa jýyq adam jiti respıratorlyq vırýstyq ınfektsııamen aýyrǵan.

SQO sanıtarııalyq-epıdemıologııalyq baqylaý departamentiniń málimetinshe, ótken kezeńmen salystyrǵanda syrqattanýshylyq 8,4% tómendegen. 

Aýyrǵandardyń 64% — 37 myńnan astam adam 14 jasqa deıingi balalar.
Sońǵy aptada 3 myń JRVI-di juqtyrý jaǵdaıy tirkeldi. Aldyńǵy aptamen salystyrǵanda syrqattanýshylyq shamamen sol deńgeıde qalyp otyr.

Epıdemıologııalyq maýsymda A (H3N2) tumaýynyń 221 jaǵdaıy tirkeldi. Sonyń ishinde 14 jasqa deıingi 89 bala aýyrǵan, qalǵany eresekter.

Oblysta budan bólek, tumaýǵa jatpaıtyn vırýstardyń 59 jaǵdaıy anyqtaldy. Basym úlesi — rınovırýstar — 32 jaǵdaı, bokavırýstar — 10 jaǵdaı, adenovırýstar — 4 jaǵdaı, RS-vırýs — 13 jaǵdaı.

Dárigerler JRVI men tumaýdyń alǵashqy belgileri baıqalǵan kezde ózin-ózi emdeýge bolmaıtyndyǵyn eske salady. Mundaıda birden medıtsınalyq kómekke júginý qajet, dárigerdi úıge shaqyryp, aýrýdy taratpaý úshin naýqas balany balabaqshaǵa nemese mektepke jibermeý kerek. 

Buǵan deıin Almatyda 15 myń turǵyn JRVI men tumaý juqtyrǵanyn jazǵan edik.