SQO-da boıjetkendi ólimnen qutqarǵan polıtseı úzdik maman atandy
PETROPAVL. QazAqparat - SQO-da boıjetkendi sýıtsıdten qutqarǵan polıtseı Rýslan Aqmatov «Óz kásibiniń úzdigi» baıqaýynda jeńimpaz atandy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, baıqaý Jergilikti polıtsııa qyzmeti basqarmasy oblystyq jáne qalalyq patrýldik polıtsııa batalondary qyzmetkerleri arasynda ótti.
«Patrýldik polıtseı kez kelgen jaǵdaıǵa daıyn bolýy tıis. Baıqaý kezinde zańnamany bilý, atys daıarlyǵynyń, qoıan-qoltyq urystyń teorııasy men praktıkasy ǵana emes, alǵashqy medıtsınalyq kómek kórsetý, qozǵalysy kóp kóshe qıylystarynda qozǵalysty qolmen retteý tájirıbesi tekserildi. Baıqaýdy qorytyndylaǵan kezde qatysýshylardyń qys mezgilinde jeńil jáne júk kóligimen jyldam júrip manevr jasaýy boıynsha ótken saıystardyń nátıjeleri, sondaı-aq, úmitkerlerdiń qyzmettegi jetistikteri de eskerildi», - deıdi uıymdastyrýshylar.
Baıqaýǵa toǵyz maman qatysyp, patrýldik polıtsııa batalonynyń qyzmetkeri polıtsııa aǵa serjanty Rýslan Aqmatov úzdik atandy.
«Men úshin eń qıyn synaq - qarýmen atý boldy, - deıdi jeńimpaz. - Erejeler ózgerdi: nysana bul joly jaqyn bolǵanymen, jyldam atý daǵdylaryn kórsetý qajet. Bul - daıarlyqtyń mańyzdy baǵyty jáne barlyq qyzmetkerler jaqsy nátıje kórsetti».
Rýslan Aqmatov polıtsııada 2014 jyldan qyzmet etedi. Boks jáne qoıan-qoltyq urysynan sport sheberine úmitker, sondaı-aq sporttyq atýdan birinshi razrıady bar. Onyń sporttyq daıarlyǵynyń jumysynda kómegi zor. Ol 2016 jyly ózine-ózi qol jumsamaqshy bolǵan qyzdy qutqaryp qaldy. Ómirmen qoshtasqaly turǵan boıjetkendi qutqarý úshin Rýslanǵa Esil ózenindegi kópir arkasynyń eń bıigine kóterilýge týra keldi.
«Úzdik maman ataǵyn Rýslan Aqmatov ekinshi jyl qatarynan ıelenip keledi, - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov. - Jeńimpazdar Nur-Sultan qalasynda bolatyn respýblıkalyq baıqaýǵa barady. Jyl saıynǵy baıqaýdyń mańyzdy maqsatynyń biri - jeke quramnyń kásibı sheberlikterin turaqty túrde arttyryp turýǵa qyzyǵýshylyǵyn arttyrý».
