SQO-da bótenniń jylqylaryn aıdap ketken urylar ustaldy
PETROPAVL. QazAqparat – Soltústik Qazaqstan oblysynyń Jambyl aýdanynan urlanǵan 5 jylqy Petropavl qalasynan tabyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Jambyl aýdany Baıan aýylynyń bes turǵynynyń qashaǵa qamalǵan 24 jylqysy tańerteń ornynda bolmaı shyqqan. Olardyń 15-in ǵana jaqyn mańnan tapqan aýyldyqtar Jambyl aýdanynyń polıtsııa bólimshesine aryzdandy.
Bes úıdiń jylqysyn kúndiz jylqyshy baqsa, keshke qaraı túlikti kúzetilmeıtin qashada qaldyryp otyrǵan. Sol sebepti uryǵa sym oralǵan qaqpany ashyp, jylqylardy shyǵaryp alý esh qıyndyq týdyrmaǵan. Alaıda, tergeý barysynda belgili bolǵandaı, ury qalyń tumannyń saldarynan jylqynyń bir bóligin jolda joǵaltyp alǵan.
Tártip saqshylarynyń aıtýynsha, jaýǵan jańbyr izdi shaıyp, ıisshil ıtter de urylardyń sońyna túse almady. Aýdandyq polıtsııa bóliminiń tórt qyzmetkeri, malyn joǵaltqan bes jábirlenýshi úsh kún boıy orman-dalany kezip, jolda adasyp qalyp qoıǵan taǵy tórt jylqyny tapty.
«Esil aýdany Amangeldi aýylynyń mańynda izden múlde aıyryldyq. Biraq, izdestirý barysynda jınaǵan aqparat, basqa bólimshelerdiń jumysynyń nátıjesi bizge kúdiktini anyqtaýǵa kómektesti. Petropavl qalasynyń 45 jastaǵy turǵyny buǵan deıin de urlyq úshin birneshe ret isti bolǵan. Biz ony turǵylyqty jeri boıynsha taptyq», - deıdi Jambyl aýdany PB krımınaldyq polıtsııa bólimshesiniń bastyǵy Juldyzbek Aıtbaev.
Úsh kún boıy kúdiktini baqylaýǵa alǵan polıtseıler onyń qylmysqa qatysy bolýy múmkin sybaılastaryn anyqtap, urlanǵan jylqyny tapty. Bes jylqy Jumysshy kentinde turatyn kúdiktiniń týysynyń qorasynan tabyldy. Kúdikti qamaýǵa alynyp, mal ıelerine qaıtaryldy.
Jalpy, jyl basynan oblysta mal urlyǵyna qatysty 64 qylmys tirkelip, onyń 40-y búginde ashyldy.
