SQO-da «Botaı» atty jańa oıyn paıda boldy
PETROPAVL. QazAqparat - Soltústik Qazaqstan oblysynda «Botaı» atty jańa oıyn paıda boldy. Ol - ulttyq «Saqa» oıynyn negizge ala otyryp jasalǵan, dep habarlaıdy QazAqparat.
Petropavlda jańadan paıda bolǵan «Botaı» oıynynan qalalyq tusaýkeser jarys ótti. Oǵan qalalyq qazaq mektepteriniń jáne kolledjdiń dene shynyqtyrý muǵalimderi, barlyǵy - 18 adam qatysty. Bul jarys jańa «Botaı» oıynymen tanystyrý maqsatynda uıymdastyrylyp otyr. Keıin ustazdar óz bilim ordalarynda oıynnyń erejesin, ádis-tásilderin oqýshylaryna úıretetin bolady. Osylaısha umyt bolǵan ulttyq saıysymyz qaıta jańǵyrady degen úmit bar.
«Botaı» oıynynyń avtory, «Qyzyljar jastary» jastar qoǵamdyq birlestiginiń tóraǵasy Erlik Muhamedjanovtyń aıtýynsha, «Saqa» oıyny búginde umyt bolǵan. Oıyn erejesi esh jerde jazylmaǵan. Sol sebepti ulttyq sport túri sanalatyn oıyndy qaıta jańǵyrtýdy maqsat etipti. 3 jyl tynbaı izdenip, aýyl aqsaqaldarymen, kórgen-bilgen azamattarmen kezdesip, aqyldasyp, aqparat jınap, «Saqa» oıyny negizinde «Botaı» oıynynyń erejelerin jasap shyqqan.
«Botaı» oıyny jylqynyń jáne qara maldyń topaı súıekterimen oınalady. Ózimiz bala kezimizde aýylda shańǵa kómilip oınaıtynbyz. Bizden keıingi balalardyń saqaǵa áýestengenin kórmeppin. Bul - bizdiń ata-babamyzdan qalǵan mura ǵoı, nege jańǵyrtpasqa degen oı keldi. Al, «Botaı» ataǵan sebebimiz - jylqynyń alǵash ret Soltústik Qazaqstanda qolǵa úıretilgendigi Botaı qonysynan tabylǵan jádigerler arqyly dáleldendi. Qazba jumystary kezinde jylqynyń topaı súıekteri kóptep tabylǵan eken. Bolashaqta bul oıyndy óńirdiń brendine aınaldyrýdy maqsat ettim»,- deıdi Erlik Muhamedjanov.
Saıysty uıymdastyrýshylardyń aıtýynsha, bul oıyn «Saqa» oıyny negizinde jasalǵanymen, jarys ótkizýge bolatyndaı erejesine ózgerister engizildi. «Botaıdy» kez-kelgen jerde oınaı berýge bolady, jylqy men iri qara maldyń topaı súıekteri bolsa bolǵany.
«Oıynnyń erejesi boıynsha ár oıynshynyń eki dıi, bir saqasy bolady. Oıyn alańynda ózderiniń dılerin quryp, syzyqtan saqasymen atyp shyǵarýy kerek. «Asyq atý» alańy sheńberlerden tursa, munda tiktórtburysh. Bul jaı ǵana syzylǵan syzyq emes, sporttyq erejege sáskestendirilip keltirilgen . Munda ár syzyq bir tabandy kórsetedi»,-deıdi saıystyń bas tóreshisi Qýat Haırýllın.
«Botaı» oıyny eptilikke, mergendikke, shapshańdyqqa baýlıdy. Balanyń kúsh-jigerin arttyryp, eptiligin jáne qyraǵylyǵyn jetildiredi. Oıyn barysynda únemi qımyl-qozǵalysta bolǵandyqtan boıdaǵy qan aınalymyn jaqsartady, deneni shynyqtyrady eken.
Uıymdastyrýshylar «Botaı» oıynyn kelesi jyly oblystyq kólemde ótkizýdi josparlap otyr. Eger sáti túsip jatsa ári qaraı respýblıkalyq, tipti halyqaralyq dárejege de kóterý kózdelgen. Maqsat - qazaqtyń ulttyq qundylyqtaryn barynsha nasıhattaý.
