SQO-da botanıkalyq baq jańǵyrtylyp jatyr
PETROPAVL. QazAqparat – Petropavldaǵy «Qyzyljar oranjereıasy» botanıkalyq baǵyn kúrdeli jóndeýden ótkizýge 100 mln teńge bólingen, dep habarlaıdy QazAqparat tilshisi.
Petropavl qalasynyń negizgi týrıstik nysandarynyń biri, turǵyndardyń súıikti demalys orny, ǵasyrdan astam tarıhy bar «Qyzyljar oranjereıasy» jaqynda jańa keıipke enedi. Ony kúrdeli jóndeýge jergilikti bıýdjetten 100 mln teńge bólindi. Qurylys barysyn Soltústik Qazaqstan oblysynyń ákimi Qumar Aqsaqalov baryp kórdi.
Nysan sońǵy ret shamamen on jyl buryn jóndelgen. Qazir baqta toǵan, sýburqaq, voler, qysqy baq, kireberis jáne rotond jóndelip jatyr. Jańa kishi sáýlet formalary, dekoratıvti qabyrǵa jáne jasandy sýburqaq ornatylmaqshy.
Baqtyń negizi 1912 jyly qalanǵan. Ol – respýblıkadaǵy eń alǵash ashylǵan oranjereıalardyń qatarynda. Qysy-jazy gúldep turatyn biregeı baqta ár túrli elden ákelingen ekzotıkalyq ósimdikterdi kezdestirýge bolady.
Qazir munda qysqy baqtan bólek oranjereıa, janýarlar men qustar ornalasqan shaǵyn zoobaq jáne jaralanǵan ań men qusty ustaýǵa arnalǵan vıvarıı bar. Baqtyń aýlasynda aqqý, úırek-qazy bar toǵan ornalasqan.
Aqerke Dáýrenbekqyzy
