SQO-da borannan birneshe eldi meken elektr jaryǵynsyz qaldy
Soltústik Qazaqstan oblysynda borannyń saldarynan birneshe eldi meken elektr jaryǵynsyz qaldy. Keı aýdandarda sý da joq. Jaýapty qyzmetter apattyń saldaryn joıý maqsatynda kúsheıtilgen jumys tártibine kóshken, dep habarlaıdy Kazinform.
Qyzyljar aýdany Beskól aýylynda elektr jaryǵy 18 qarasha kúni saǵat 19.00 shamasynda sóndi. Kóp uzamaı sý berý de toqtatyldy. Tek búgin saǵat 13.00-ge taman ǵana jaryq qosyldy. Sýmen qamtý ázirge qalpyna kelgen joq.
Qyzyljar aýdandyq ákimdiginiń málimetinshe, qolaısyz aýa raıyna baılanysty negizgi magıstraldi elektr taratý jelisi isten shyqqan. Saldarynan Beskólde jylytý júıesi toqtatyldy. Barlyq qyzmet kúsheıtilgen tártipte jumysqa kiristi.
«Soltústik-Qazaqstan Elektrjelistik Taratý Kompanııasy» AQ málimetinshe, 18 qarasha kúni aýa raıyna baılanysty SQO aýmaǵyndaǵy qondyrǵylarda jáne jelilerde birneshe tehnologııalyq buzylý faktisi tirkeldi. Jabysqaq qar men qatty jel saldarynan elektr taratý jelilerine muz qatyp, úzildi. Qazirgi ýaqytta brıgadalar elektr jelilerin tekserip, apat oryndarynda jumys istep jatyr. «Aqqaıyń aýdany, sonyń ishinde aýdan ortalyǵy Smırnovoda, M.Jumabaev, Qyzyljar aýdany, sonyń ishinde Beskólde, Mamlıýt, Jambyl, Esil, Tımırıazev, Shal aqyn aýdandarynda elektr qýaty bolǵan joq.
M.Jumabaev aýdanynda eń kúrdeli tehnologııalyq buzylý tirkeldi. VL-110 kV «PTETs-2-Býlaevo-neft» tiregi isten shyǵyp, aýdan tolyqtaı elektr qýatynan ajyrap qaldy. Qazirgi ýaqytta qalpyna keltirý jumysy júrgizilip jatyr.
Bolǵan jaǵdaıǵa túsinistikpen qaraýǵa shaqyramyz, brıgadalar kúsheıtilgen rejım tártibinde apat saldaryn joıyp jatyr», - dep jazdy kompanııa ókilderi áleýmettik jelidegi paraqshasynda.
