SQO-da boranǵa baılanysty bir táýlikte qutqarý qyzmetine 600-den astam qońyraý tústi

PETROPAVL. KAZINFORM – Soltústik Qazaqstan oblysynda qar qursaýynda qalǵan 50-den astam adam jylytý pýnkterine jetkizildi.

14 qańtarda SQO aýmaǵynda qys qaıta qaharyna minip, aqtútek boran saldarynan tas joldar jabyldy. Oblystyq tótenshe jaǵdaılar departamenti baspasóz qyzmetiniń málimetinshe, 626 myńnan astam abonent "Darmen" mobıldi qosymshasy arqyly eskertilip, olarǵa SMS habarlama jiberildi.

Alaıda, eskertýge qaramastan, jolǵa shyqqandar bolǵan.

Esil aýdany Aqtas aýylynyń mańyndaǵy avtojolda avtobýs pen 26 jolaýshysy bar 5 jeńil avtokólik jolda qaldy. Jol qyzmetteri, jergilikti atqarýshy organdar men polıtsııa, qutqarýshylar jedel áreket etip, qar qursaýynda qalǵandar Aqtas aýylyna jetkizildi. Eshkimge medıtsınalyq kómek qajet bolmady.

Osy aýdannyń Novoýzınka aýylynyń mańynda 8 jolaýshysy bar 3 jeńil avtokólik jolda qalǵan. Oqıǵa ornyna jedel túrde № 10 órt sóndirý bóliminiń qyzmetkerleri TREKOL kóligimen jetip, kólikterdi Korneevka eldi mekenine deıin súırep apardy. Adamdar osy aýyldaǵy jylytý pýnktine ornalastyryldy. Úsik shalǵandar joq.

Ýálıhanov aýdanyndaǵy "Kókshetaý-Omby" avtojolynda 3 shaǵyn avtobýs jol-kólik oqıǵasyna ushyraǵan. Adamdar Bıdaıyq aýylynyń jylytý pýnktine jetkizildi. Bári din aman.

Keshke qaraı Taıynsha aýdanynda joldardyń jabylýyna baılanysty Kellerovka aýylynyń jylytý pýnktine jergilikti atqarýshy organdar 27 adamdy ornalastyrdy, onyń altaýy – bala. Olarǵa medıtsınalyq kómek qajet bolmady.

Jalpy 14 qańtar kúni 112 telefonyna 630-dan astam qońyraý kelip túsken.