SQO-da borandy kúni jolda qalǵan 20-ǵa jýyq adam qutqaryldy

PETROPAVL. QazAqparat – Soltústik Qazaqstan oblysynda borannyń saldarynan qar qursaýynda qalǵan 5 kólik shyǵarylyp, jolda qalǵan jıyrmaǵa jýyq adam qutqaryldy, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, 8 qańtar kúni keshke Ǵabıt Músirepov atyndaǵy aýdannyń Novoıshımskoe eldi mekenindegi № 16 órt sóndirý bóliminiń baılanys pýnktine 5 jeńil avtokóliktiń qar qursaýynda qalǵany týraly telefon habarlamasy kelip tústi. Kólikter Shuqyrkól men Novoselovka aýyldary arasynda turyp qalǵan.

Jolda qalǵandardy qutqarýǵa birden TREKOL arnaıy kóligimen órt sóndirý bóliminiń jeke quramy shyqty. Saǵat 19.05-te Shuqyrkól aýylynyń mańynda 15 jolaýshy, sonyń ishinde qarttar, áıelder jáne 2 bala bolǵan avtokólikter tabyldy. Mashınalardyń biri synyp qalǵan eken. 7 adam, onyń ishinde qatty tońǵan 2 bala TREKOL avtokóligimen evakýatsııalandy.

Sonymen qatar, jolda qalǵan adamdarǵa kómekke kelgen «Jasyl Esil 2» JShS júk tıegishi joldardy ashyp, avtokólikterdiń qar qursaýynan shyǵýyna jaǵdaı jasady. Synǵan kólik jaqyn mańdaǵy eldi mekenge jetkizildi.

«Jolǵa shyqqan adamdar boranǵa tap bolǵan. Qatty tońǵan, biz qajetti kómek kórsettik. Alǵystaryn aıtyp jatyr. Kómektesý bizdiń mindetimiz», - deıdi TJ bóliminiń bastyǵy Sanat Muqashev.