SQO-da boranda polıtseıler 600-den astam avtokólikti kolonnamen alyp júrdi
PETROPAVL. KAZINFORM – Soltústik Qazaqstan oblysynda birneshe kúnge sozylǵan boran saldarynan kólik qozǵalysy qıyndady.
Júrgizýshilerdiń jolda qalýyna jol bermeý úshin óńirde barlyq baǵyttaǵy joldar jabyldy.
SQO polıtsııa departamenti baspasóz qyzmetiniń málimetinshe, boranǵa baılanysty jeksenbi kúni keshke avtojoldarda qozǵalys tek polıtsııa uıymdastyrǵan kolonnalarmen ashyldy.
Kolonnaǵa turǵan ár júrgizýshige egjeı-tegjeıli nusqaýlyq berildi. Olar jyldamdyqty saǵatyna 80 shaqyrym deńgeıinde saqtaýǵa, sapty buzbaýǵa, basyp ozbaýǵa mindetti boldy. Kolonnanyń aldynda jáne sońynda patrýldik avtokólikter júrip otyrdy. Tártip saqshylary kolonnalardy óz ýchaskeleriniń shekarasyna deıin alyp júrip, keıin olardy kelesi ekıpajdarǵa tapsyrdy. Oblys shekarasynda júrgizýshilerdi kórshiles óńirlerdegi áriptester qabyldap aldy.
Jeksenbiden dúısenbige qaraǵan túni polıtseıler SQO aýmaǵynda 600-den astam jeńil avtokólikti alyp júrdi. Qolaısyz aýa raıy ýaqytynda respýblıkalyq mańyzy bar avtojoldarda jol-kólik oqıǵalary tirkelgen joq.
Bul jumys dúısenbi kúni tańerteń de jalǵasty.
Buǵan deıin Aqmola oblysynda júrgizýshi ekskavatormen birge sýǵa batyp ketkenin jazǵan edik.
