SQO-da boranda adasqan jas jigit pen 7 jasar bala aman tabyldy
PETROPAVL. QazAqparat – Soltústik Qazaqstan oblysynda boranda jylqy izdeýge shyǵyp ketip adasqan aǵaly-inili 19 jastaǵy jigit pen 7 jasar bala aman-esen tabyldy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, qatty borannyń saldarynan qar qursaýynda qalǵan 34 kólik qaýipsiz jerge shyǵarylyp, 94 adam qutqaryldy.
Qutqarýshylardan kómek suraǵan habarlama Esil aýdany Birlik aýylynan saǵat 20.00 shamasynda túsken.
19 jastaǵy jigit pen 7 jasar bala at-shanamen joǵalǵan jylqyny izdeýge shyǵyp ketip, eki saǵattaı olardan habar bolmapty.
«Aǵaly-inili eki balany izdeýge «TREKOL» kóligimen 5 qutqarýshy, 30 shaqty aýyl turǵyny, ÝAZ jáne qarda júrgish kólikpen 6 polıtsııa qyzmetkeri attandy. Túngi saǵat 23.39-da polıtseıler olardy Esil ózeninde, Birlik aýylynan 5 shaqyrymdaı jerden tapty. Ekeýi de aman, jaǵdaılaryn teksertý úshin aýdandyq aýrýhanaǵa jetkizildi», - deıdi SQO TJD basshysy Ramıl Kamalov.
Saǵat 17.15-te Taıynsha aýdany Makashevka eldi mekeninen habarlama tústi. Aýyldan 1,5 shaqyrym jerdegi Qumdykólge balyq aýlaýǵa ketken 1983 jylǵy er adam joldan adasqan.
«Bizge áıeli habarlasyp kómek surady. Kelinshektiń aıtýynsha, kúıeýi qarda júrgish kólikpen shyqqan. Alaıda, onyń janarmaıy bitýge jaqyn, sondaı-aq uıaly telefony otyryp qalǵan. 5 qutqarýshy, 5 tártip saqshysy, qoryqshy jáne qarda júrgish kólik mingen taǵy 4 adam izdeýge shyqty. Saǵat 04.43-te belgi beretin raketany atqannan keıin ǵana er adam kól jaǵasynan tabyldy. Jaǵdaıy qalypty, medıtsınalyq kómek qajet bolǵan joq», - deıdi Ramıl Kamalov.
Al Mamlıýtka aýdanynda saǵat 22.30 shamasynda Reseı jaqtan kele jatqan 70 shaqty kólik qar qursaýynda qalǵan. Olardy qar tazalaıtyn tehnıka bastap, Petropavlǵa deıin joldy ashyp otyrdy.
Tımırıazev aýdany Aqjan aýylyna 1 shaqyrym jeter-jetpesten respýblıkalyq mańyzy bar jolda túnde eki kólik jolda qalǵan. Kóliktegi 5 adam, sonyń ishinde 3 bala aman-esen aýdan ortalyǵyna jetkizildi.
