SQO-da boran soǵyp tur: 37 adam qar qursaýynan shyǵaryldy
PETROPAVL. QazAqparat – Soltústik Qazaqstan oblysynda boran tyıylmaı tur, avtojoldardyń 42 ýchaskesinde qozǵalys jabyldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, óńirde búgin de qar jaýyp, boran soǵady. Qazirgi ýaqytta avtokóliktiń barlyq túrleri úshin 5 - respýblıkalyq mańyzy bar, 37 - oblystyq mańyzdaǵy joldar jabyldy.
Tótenshe jaǵdaılar jáne polıtsııa departamentiniń, jolaýshylar kóligi jáne avtomobıl joldary basqarmasynyń, «QazAvtoJol» UK» AQ jaýapty qyzmetkerleriniń qatysýymen oblystyq jedel shtab jumys isteıdi, zardap shekkenderden habarlama qabyldaý úshin «jedel jeli» ashylǵan. Ótken túnde mamandardyń kómegine ondaǵan soltústikqazaqstandyq júgindi.
Tımırıazev aýdany Dmıtrıevka eldi mekeniniń «Voloshenka –Tımırıazev» respýblıkalyq mańyzy bar avtojolynda qutqarýshylar «Nıva Bronto» jol talǵamaıtyn kóligimen, «DEÝ – 63» kásipornynyń 3 tehnıkasyn paıdalana otyryp, 15 kólikti jáne 37 adamdy, onyń ishinde bir balany qaýipsiz jerge shyǵardy.
Respýblıkalyq mańyzy bar «Jezqazǵan– Petropavl» tas jolynyń Keńes jáne Jańajol aýyldarynyń arasynda metall qubyrlary tıelgen VOLVO júk kóligi joldan shyǵyp ketken. Shal aqyn aýdanynyń № 6 órt sóndirý qyzmeti mamandary jáne polıtsııa qyzmetkerleri, «ASA – 20» apattyq-qutqarý avtokóligi paıdalana otyryp, kólikti alyp shyqty.
Jalpy 20 aqpanǵa qaraǵan túni oblys joldarynda 15 tehnıka jáne 37 adam evakýatsııalandy.
