SQO-da boran saldarynan 400-den astam úı jaryqsyz qaldy
PETROPAVL. QazAqparat – Soltústik Qazaqstan oblysynda qatty borannyń saldarynan eki aýdanda elektr qýaty óship qaldy, dep habarlaıdy QazAqparat tilshisi.
SQO tótenshe jaǵdaılar departamentiniń bastyǵy Ramıl Kamalovtyń aıtýynsha, qalyń jaýǵan qar men ekpini sekýndyna 15-28 metrge deıin jetken jeldiń saldarynan Aqjar aýdanynda 128 úı jaryqsyz qaldy. Elektr jelisindegi apattyń saldaryn birden joıý múmkin bolmaǵan.
«Taıynsha aýdanynda da qatty borannyń saldarynan 300 shaqty úı elektr qýatynsyz qaldy. Boran tek tańǵy jaqyn ǵana basylyp, jaǵdaı turaqtaldy. Qazir elektr jelisin jóndeý jumystary júrgizilip jatyr», - deıdi Ramıl Kamalov.
SQO-da «oıran» salǵan tsıklon Reseı aýmaǵyna qaraı oıysty. Bas qutqarýshynyń aıtýynsha, endi borannyń arty aıazǵa ulaspaq. Arqany keńge salýǵa erte, boljam boıynsha aldaǵy kúnderi áli de boran bolýy yqtımal.
Buǵan deıin boranda jolda qalǵan 94 adamnyń qutqarylǵanyn aıtqan edik.
