SQO-da boran: 70 kólikten turatyn kolonnany polıtseıler Petropavlǵa jetkizdi
PETROPAVL. QazAqparat – Soltústik Qazaqstan oblysynda «Qaýipsiz jol» jedel-profılaktıkalyq is-sharasy ekstremaldy jaǵdaıda ótip jatyr.
Boranǵa baılanysty negizgi kúsh oblys joldaryna baǵyttaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, qatty boranǵa baılanysty Mamlıýt aýdanynda Qorǵan-Petropavl tas jolynda 70-ten astam júk kóligi men jeńil avtomobıl jınalyp qaldy. Máseleni sheshý úshin kolonna qurýǵa sheshim qabyldanady. Joldy «Qazaqavtodor» JShS-niń qar tazalaıtyn mashınasy ashyp otyrdy, al kolonnany patrýldik mashınalar alyp júrdi. Barlyq avtokólik aman-esen Petropavlǵa jetti.
Jalpy bul túni tótenshe jaǵdaılar departamenti jáne jol uıymdarymen birge qar qursaýynan 94 adam qutqaryldy, onyń 9-y bala. Qarǵa batqan 34 tehnıka shyǵaryldy.
Jalpy óńirde «Qaýipsiz jol» jedel-profılaktıkalyq is-sharasy ótip jatyr.
«18 aqpanǵa qaraǵan túni Aıyrtaý aýdanyndaǵy Saýmalkóldiń kósheleriniń birinde VAZ-210740 avtokóligi toqtatyldy. Onyń 23 jastaǵy júrgizýshisinen alkogoldiń ıisi shyǵyp turdy. Saraptama ony rastady. Sot sheshimimen aýyl turǵyny ákimshilik qamaýǵa alynyp, 7 jylǵa kólik júrgizý quqyǵynan aıyryldy. Oblysta ótken is-sharanyń eki kúni ishinde osyndaı 17 jaǵdaı tirkeldi. 61 júrgizýshi jyldamdyqty asyryp, 19 júrgizýshi baǵdarshamnyń tyıym salynǵan belgisine ótip ketti», - deıdi SQO PD Jergilikti polıtsııa qyzmeti basqarmasynyń erekshe tapsyrmalar jónindegi aǵa ınspektory Azamat Jamuqov.
Operatsııanyń 2 kúni ishinde SQO-da 1094 túrli quqyq buzýshylyq anyqtaldy.
