SQO-da bógetterdiń qurylysyna qatysqan kásipkerler tıisti aqshalaryn ala almaı júr

PETROPAVL. KAZINFORM – Byltyrǵy tótenshe jaǵdaı kezinde atqarǵan jumystary úshin jergilikti jobalaýshy jáne qurylys uıymdary Petropavl ákimdiginen aqshalaryn ala almaı júr.

Bul máseleni kásipkerler oblys ákiminiń orynbasary Rústem Kurmanovpen kezdesýde kóterdi.

Tıisti jumys atqarylǵanymen, jergilikti ákimdiktiń turǵyn úı-kommýnaldyq sharýashylyǵy bólimi aqyny tóleýge asyǵar emes. 

Soltústik Qazaqstan oblysy kásipkerler palatasynyń salalyq keńes tóraǵasy Ámirjan

Shákeıdiń aıtýynsha, ótken jyldyń tamyz aıynda «Gotıka» JShS qalalyq ákimdikpen shartqa otyrdy. Kompanııa Jeńis saıabaǵynda nóser kárizin salýǵa 14 mln teńgege jobalyq-smetalyq qujattama ázirledi. 

- Jobalyq-smetalyq qujattama (JSQ) boıynsha jumys is júzinde aıaqtalǵanyna qaramastan, shart áli de qazynashylyq organdarynda tirkelmegen, saldarynan tólem jasaý múmkin emes.

Sondaı-aq, osy jyldyń qańtarynda sol kompanııa TÚKSh bólimimen taǵy bir shartqa otyrdy.

Olar 20 mln teńgege jýyq somaǵa Bylǵary zaýyty kenti bógetiniń JSQ túzetti. «Gotıka» JShS saraptamadan ótý úshin ózi tólem jasady, biraq bul shart ta áli memlekettik qazynashylyqta tirkelmegen. Al tirkelmegendikten, tólem de joq, - dedi Ámirjan Shákeı.

Dál osyndaı kelisim Qyzyljar aýdanyndaǵy Teplıchnoe eldi mekenindegi bógetke qatysty da jasalǵan. Bul jumys ta atqaryldy, biraq búginge deıin tólem joq. 

Oblys ákiminiń orynbasary Rústem Qurmanov máseleniń jaqyn arada sheshiletindigin aıtty. 

- Qyzyljar aýdany boıynsha jaqynda máslıhat sessııasy bolady, qarajat bólinedi, tólem jasalady. Qalalyq ákimdik boıynsha da aqsha keshiktirilip tólenedi, - dedi Rústem Qurmanov. 

Byltyrǵy tótenshe jaǵdaı kezinde jumys istep, biraq sol úshin tólem almaǵan kompanııalardyń taǵy biri – «TFA GROUP» JShS. Jergilikti atqarýshy organdardyń aýyzsha tapsyrmasy boıynsha Petropavlda bóget salý jáne nyǵaıtý úshin 109 myń tekshe metrden astam balshyqty qyrkúıekten jeltoqsanǵa deıin tasyǵan. 

- Kompanııa 54 mln teńgege balshyq tasydy. Alaıda, jumystyń oryndalýyna jáne qurylystyń aıaqtalýyna qaramastan, bas merdiger «QazStroıTehnık» JShS Petropavl ákimdiginiń TÚKSh bólimine siltep, shartqa qol qoıýdan jáne tólem jasaýdan bas tartyp otyr, - deıdi SQO Kásipkerler palatasy salalyq keńesiniń tóraǵasy Ámirjan Shákeı.

SQO ákiminiń orynbasary Rústem Qurmanovtyń aıtýynsha, qalalyq ákimdik bas merdiger «QazStroıTehnık» JShS-men tolyq esep aıyrysqan. Sol sebepti Petropavl qalalyq TÚKSh bólimine mán-jaıdy anyqtaýdy tapsyrdy. 

Buǵan deıin Petropavl mańyndaǵy saıajaı ýchaskelerin sý basqanyn jazǵan edik.