SQO-da bógettegi beton plıtalar jarylyp ketti, qalpyna keltirýge qosymsha qarjy bóline me
PETROPAVL. KAZINFORM — Soltústik Qazaqstan oblysy Teplıchnoe eldi mekeni mańyndaǵy bógettiń topyraǵy otyryp, ústine jabylǵan beton plıtalar jarylyp qaldy.
Aýyl turǵyndarynyń pikirinshe, nysannyń qys mezgilinde salynýy qurylys sapasyna áser etýi múmkin.
Alaıda jergilikti bılik ókilderi bógettiń buzylýyna merdiger kompanııanyń qatysy joq ekenin málimdedi.
Qyzyljar aýdany ákiminiń orynbasary Bahtııar Bıkenevtiń aıtýynsha, máseleniń týyndaýyna bógettiń astynan ótetin sý qubyry sebep bolǵan.
— Sol ýchaskeden «Qyzyljar sý» JShS magıstraldy jelisi ótedi. Qubyr bógettiń astynan eki jerden tesilip, uzaq ýaqyt boıy aqqan, saldarynan topyraq shaıylyp, úıindi otyrǵan. Mamandarǵa jaǵdaıdy anyqtaý úshin bógetke jabylǵan beton plıtalardy ashýǵa týra keldi. «Qyzyljar sý» kásiporny jaýapkershilikti alyp, jumysty tolyq atqarady. Merdiger kompanııanyń kinási joq, — dedi Bahtııar Bıkenev.
Ákimdiktiń málimetinshe, jóndeý jumystaryn júrgizý úshin bógettiń 20 metrlik ýchaskesinde betondy bólshektep alý týraly sheshim qabyldandy. Keıinnen jer úıindisi men beton jabyndysy qaıta qalpyna keltiriledi.
Buǵan deıin áleýmettik jelilerde bóget qurylysynda eńbek etken jumysshylardyń jalaqy ala almaı júrgeni týraly aqparat taraǵan bolatyn. Ońtústik óńirlerden kelgen jumysshylar birneshe aı boıy eńbekaqysyz qalǵanyn aıtyp shaǵymdanǵan edi. Saldarynan jalaqy qaryzy 140 mln teńgege deıin jetken.
Bul máselege qatysty aýdan ákimdigi jaǵdaıdyń sheshilgenin habarlady.
— Jumysshylar tıisti eńbekaqylaryn tolyq aldy. Bıýdjetten merdiger kompanııaǵa qarajat ýaqytynda aýdarylǵan. Alaıda belgili bir sebeptermen qarjy jumysshylarǵa der kezinde jetpegen, — dedi Bahtııar Bıkenev.
Buǵan deıin SQO-da sý basýy múmkin eldi mekenderdi qorǵaýǵa 105 shaqyrymdyq 60 bóget salynǵanyn jazǵan edik.
