SQO-da bógetti nyǵaıtý úshin buzylýy tıis úılerdiń turǵyndary ákimdik bergen baǵamen kelispeı otyr
PETROPAVL. KAZINFORM – Soltústik Qazaqstan oblysy Prıbrejnoe eldi mekenindegi bógetti nyǵaıtý jáne keńeıtý jumystary júrgizilmek.
Sonymen qatar osy aýyldaǵy Derbes kóshesindegi turǵyndar úshin jańa qorǵanys bógetin salý máselesi de qarastyrylyp jatyr. Bul jerde nebary 8 jekemenshik úıdiń ornalasýyna baılanysty jobanyń ekonomıkalyq tıimdiligi kúmán týdyrǵan. Sol sebepti bul úılerdi buzyp, turǵyndaryna ótemaqy berý josparlanǵan.
Alaıda turǵyndar óz múlikteriniń ákimdik usynǵan aldyn ala baǵasyna kelispeıtinin bildirdi. Olar baspananyń tym arzan baǵalanǵanyn aıtyp, jyljymaıtyn múliktiń naryqtaǵy naqty baǵasy boıynsha ótelýin talap etip otyr.
Qyzyljar aýdandyq ákimdiginiń málimetinshe, 23 qyrkúıek kúni aýdandyq ákimdikte Prıbrejnoe aýylynyń turǵyndarymen kezdesý ótti. Aýdan ákimi Beıbit Ismanov ár turǵynnyń baspanasy jeke qaralyp, sheshim qabyldanatynyn aıtty jáne kóshpeli kezdesý ótkizýge ýaǵdalasty.
25 qyrkúıek kúni keshke aýdan basshysy turǵyndardyń úılerine baryp, jaǵdaımen tanysty.
- Dúısenbi kúni basqa kompanııa kelip, úılerińizdi sársenbige deıin baǵalaıdy. Qorytyndysyn alǵannan keıin, aldyndaǵy baǵalaýmen salystyryp baryp, sheshim qabyldaımyz. Bul bizdiń sońǵy kezdesýimiz emes, - dedi Beıbit Ismanov.
Esterińizge salaıyq, Qyzyljar aýdanyndaǵy Prıbrejnoe eldi mekeni tasqyn sýdyń jolynda tur. Jylda kóktemde sý tasyǵanda aýylǵa qaýip tónedi.
Bıyl jylda jolyn sý basatyn Prıbrejnoe eldi mekenine kópir salynatynyn jazǵan edik.