SQO-da bóget salǵan merdigerge tıisti qujatsyz 1 mlrd astam teńge tólem jasalǵan
PETROPAVL. KAZINFORM - Soltústik Qazaqstan oblysy Qyzyljar aýdany ákimdigi salynǵan eki bóget úshin merdiger uıymǵa bıýdjet qarajatyn zań talaptaryn buza otyryp tólegen.
Tártiptik keńeste Qyzyljar aýdany turǵyn úı-kommýnaldyq sharýashylyq bólimi basshysynyń orynbasary Baqytjan Tashevaǵa qatysty is qaraldy.
Memlekettik qyzmet isteri agenttiginiń SQO boıynsha departamentiniń bas mamany Dıana Salǵarınanyń aıtýynsha, bıyl Іshki memlekettik aýdıt komıteti tapsyrmasymen oblystyq departament osy bólimde aýdıt júrgizgen. Mamandar 2025 jylǵy jeltoqsan aıyndaǵy kezeńdi qamtydy.
Tekserý nátıjesinde, bólim basshysynyń mindetin atqarǵan Baqytjan Tashevanyń 2025 jyldyń jeltoqsan aıynda merdiger uıym — «Tıtan-Sever» kompanııasyna oryndalǵan jumystar aktisi bolmasa da iri kólemde qarjy aýdarǵany anyqtaldy.
ıAǵnı, Teplıchnoe aýylyndaǵy qorǵanys bógetin qaıta jańartý jobasy boıynsha 295,3 mln teńge, Prıbrejnoe aýylyndaǵy uqsas jobaǵa jalpy somasy 992,6 mln teńgege deıin tólem júrgizilgen.
Bıylǵy 20 naýryzdaǵy aýdıtorlyq esepte qajetti qujattardyń joq ekeni naqty kórsetilgen. Tıisti qujattardy usynbaǵany úshin Qyzyljar aýdandyq sotynyń 2026 jylǵy 10 naýryzdaǵy qaýlysymen sheneýnik ákimshilik jaýapkershilikke tartylyp, bul sheshimge shaǵym berilmegen.
- Keıin qyzmettik tekseris barysynda aktiler usynylǵanymen, qazir olardyń shynaıylyǵy kúmán týdyryp otyr.
Bul áreketterden memlekettik qyzmet týraly zań talaptaryn buzý, kásipkerlik qyzmetke zańsyz qoldaý kórsetý belgilerin kórýge bolady.
Osy fakti boıynsha Baqytjan Tasheva áreketinde zańbuzýshylyq bar dep tanyldy. Ol qazirgi ýaqytta da bólim basshysynyń orynbasary qyzmetin atqarady jáne buǵan deıin etıka normalaryn buzǵany úshin «qatań sógis» alǵan, - deıdi Dıana Salǵarına.
Buǵan deıin SQO-da memqyzmetshilerdiń eńbek quqyǵy buzylyp kelgenin jazǵan edik.
