SQO-da blokposttardy aınalyp ótpek bolǵan 5 kólik júrgizýshisi ustaldy

PETROPAVL. QazAqparat – Soltústik Qazaqstan oblysynda tótenshe jaǵdaı rejımi engizilgeli blokposttar arqyly 22,5 myńǵa jýyq kólik ótken. Al bes kólik júrgizýshisi beketti aınalyp ótpek bolǵan kezinde ustaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, qazir óńirde 25 blokpost jumys istep jatyr. Sonyń 5-ýi Petropavl qalasynyń aınalasynda ornalasqan. Bul beketterde oblystyq polıtsııa apparatynyń, qalalyq polıtsııa basqarmasynyń, sondaı-aq Qyzyljar aýdany polıtsııa bóliminiń qyzmetkerleri táýlik boıy kezekshilik atqaryp jatyr. Osy kúnderi blokposttardan 22 myń 278 kólik ótse, 481-ine ótýge ruqsat berilmegen.

SQO komendantynyń orynbasary, SQO PD bastyǵynyń orynbasary Rýslan Nazarovtyń aıtýynsha, beketterdi aınalyp ótýdiń 5 faktisi tirkeldi. Tártip buzýshylar QR Ákimshilik quqyq buzýshylyq týraly Kodeksiniń 476-baby boıynsha ustalyp, jaýapkershilikke tartyldy. Olardyń tórteýi 3 táýlikke ákimshilik qamaýǵa alynsa, bir quqyq buzýshyǵa ákimshilik aıyppul salyndy.

«Kólik sanynyń kóp bolýy, qolaısyz aýa raıy – bul jaǵdaılardyń barlyǵy halyqtyń tirshiligin qamtamasyz etetin uıymdardyń qyzmetkerlerine, quqyq qorǵaý organdaryna da qosymsha júkteme júkteıdi. Іshki ister organdary qyzmetkerleriniń barlyq qolǵa alǵan sharalary azamattardyń qaýipsizdigi men tynyshtyǵyn qamtamasyz etýge baǵyttalǵan, barlyq shekteýlerge túsinistikpen qaraýlaryńyzdy suraımyz», - deıdi Rýslan Nazarov.

Tótenshe jaǵdaı kezinde shekteý sharalary máseleleri boıynsha azamattar 8 7152 61-25-42 telefon nómiri boıynsha júgine alady. Call-ortalyq táýlik boıy jumys isteıdi. Sondaı-aq, polıtsııa qyzmetkerleri kúdikti tulǵalar, tótenshe jaǵdaı rejımin buzý týraly faktilerdi «102» arnasyna habarlaýdy suraıdy.