SQO-da blokposttar arqyly 451 kóliktiń ótýine tyıym salyndy
SQO komendanty, polıtsııa departamentiniń bastyǵy Marat Tólebaev óńirdegi jaǵdaı boıynsha baspasóz máslıhatynda tolyq aqpar berdi. Aıtýynsha, qazirgi ýaqytta Petropavl qalasynyń aınalasynda 5 blokpost, oblys aýdandarynda 20 blokpost ornatyldy. Oblys aýmaǵyna kiretin barlyq kólik tekseriledi. Osy ýaqytqa deıin shamamen 17 myń avtokólik tekserildi, 451 avtokólikke shekaradan ótýge tyıym salyndy. Olardyń óńirge kelýine esh negiz bolmaǵan.
«Tótenshe jaǵdaı kezinde asa mańyzdy nysandar men tirshilikti qamtamasyz etý obektileri, oblys jáne qala ákimdigi, bankter kúsheıtilgen kúzetke alyndy. Inkassator mashınalaryn polıtseıler alyp júredi. Avtojoldar ǵana emes, temirjol qatynasy da baqylanady. Petropavl stantsııasyndaǵy jelilik polıtsııa bólimi temirjol jáne áýe kóligimen keletin adamdardy tekserip jatyr. Jalǵa beriletin páterler baqylaýǵa alyndy», - deıdi Marat Tólebaev.
Jalpy tótenshe jaǵdaı engizilgeli polıtsııa organdaryna barlyǵy 255 adam jetkizildi, onyń ishinde 72 adam rejımdi buzǵany úshin ustaldy.
«Búgingi kúni tótenshe jaǵdaı rejımin jáne komendanttyq saǵatty buzǵany úshin 34 adam ákimshilik jaýapkershilikke tartyldy. Zańsyz mıtıngterge qatysqany úshin 16 adam jaýapkershilikke tartyldy. Oblys aýmaǵynda qazir spırttik ishimdikterdi satýǵa tyıym salynǵan. Alaıda soǵan qaramastan alkogol satýdyń 4 faktisi anyqtaldy», - deıdi oblystyń bas komendanty.
Marat Tólebaev turǵyndardy tótenshe jaǵdaı rejımi talaptaryn qatań saqtaýǵa shaqyrdy.
«Barlyq engizilgen ýaqytsha shekteýler tek halyqtyń qaýipsizdigi men jaǵdaıdy turaqtandyrýǵa baǵyttalǵan. Turǵyndar tótenshe jaǵdaı rejımi talaptaryn qatań oryndaý arqyly quqyq qorǵaý organdaryna úlken qoldaý bildire alady», - deıdi Marat Tólebaev.
