SQO-da blokposttaǵy polıtseılerge qorǵanysh kostıýmderi berildi
PETROPAVL. QazAqparat – Soltústik Qazaqstan oblysynda blokposttarda kezekshilikte turǵan tártip saqshylary kóp ret qoldanýǵa bolatyn obaǵa qarsy qorǵanysh kostıýmderimen qamtyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, jańa kostıýmderdi alǵashqylardyń biri bolyp Petropavldaǵy 5 blokpostta turǵan polıtseıler aldy. Olarǵa búginde úlken júk artylǵan. Tártip saqshylary medıtsınalyq qyzmetkerler, veterınarlarmen birge densaýlyqtaryn qaterge tigip, kúnine júzdegen adammen baılanysqa túsedi.
«Batys» blokpostynda polıtseıler Qyzyljar, Mamlıýt, Jambyl aýdandary mańyndaǵy eldi meken turǵyndarynyń avtokólikterin tekseredi. Blokposttyń jetekshisi SQO PD Jedel-krımınalıstıkalyq basqarmasynyń bólim bastyǵy Evgenıı Bogachevtiń sózinshe, kezekshi aýysym kerek-jaraqtyń barlyǵymen: baılanyssyz termometrlermen, dezınfektsııa quraldarymen, jeke qorǵanysh quraldarymen, qolǵaptarmen, maskalarmen, kostıýmdermen qamtylǵan.
«Іshki ister mınıstri Erlan Turǵymbaevtyń bastamasymen biryńǵaı úlgide kóp ret qoldanylatyn obaǵa qarsy qorǵanysh kostıýmderiniń dızaıny ázirlendi. SQO-da olardy tigýmen Qylmystyq-atqarý júıesi departamenti aınalysady. Búgingi kúni soltústikqazaqstandyq tártip saqshylarynyń 68-ine qorǵanys kostıýmderi berildi. Bir-eki kúnde taǵy 250 jıyntyq tigilip, daıyn bolady», - deıdi SQO PD bastyǵynyń birinshi orynbasary Qanat Aıtbaev.
Ótken aptadan bastap qaýipti ınfektsııanyń bar-joǵyn anyqtaý úshin polıtseıler medıtsınalyq tekseristen ótkizile bastady. Búginge deıin oblystyń beketterine jumyldyrylǵan 280 polıtseı tekserildi. Barlyǵynyń nátıjesi - teris. Jýyrda medıtsına qyzmetkerleri soltústikqazaqstandyq polıtsııanyń jeke quramyn túgel teksermek.
