SQO-da blogerler 7 jylǵa sottaldy
PETROPAVL. KAZINFORM – Soltústik Qazaqstan oblysynda kásipkerlerdi bopsalap kelgen eki blogerge sot úkimi shyqty.
SQO sotynyń málimetinshe, isti oblystyq qylmystyq ister jónindegi mamandandyrylǵan aýdanaralyq soty alqabıler alqasynyń qatysýymen qarady.
Sottalýshylar S. jáne P. saýda ortalyqtaryndaǵy zań buzýshylyq faktilerin anyqtaý boıynsha tekserýler júrgizýdi jáne áleýmettik jelilerde jarııalamaý úshin «T» JShS dırektorynan aı saıyn 200 myń teńge tóleýdi talap etken.
JShS dırektory I. iskerlik bedeline nuqsan keltirýi múmkin dep eseptep, sottalýshylardyń talaptarymen kelise otyryp, bes aı ishinde olarǵa 1 mln teńge somasynda aqsha tólegen.
Osyǵan uqsas shema boıynsha sottalýshylar «M» JShS basqarýshy dırektorynan 50 mln teńge somasynda aqsha bopsalady. Aqshanyń bir bóligin qolma-qol berý kezinde aıyptalýshylardyń biri ustaldy.
Sot sottalǵandardyń jaýapkershiligi men jazasyn jeńildetetin mán-jaı retinde olardyń buryn sottalmaǵandyǵyn, S.-nyń asyraýynda jas balasynyń barlyǵyn eskerdi.
Sot alqabıler alqasynyń qatysýymen S. jáne P.-nyń árqaısysyna 7 jylǵa bas bostandyǵynan aıyrý jazasyn taǵaıyndady.
«T» JShS-niń azamattyq talaby qanaǵattandyryldy jáne sottalǵandardan 1 mln teńge óndirildi.
Úkim zańdy kúshine engen joq.
Esterińizge salaıyq, kásipkerden 50 mln teńge aqsha bopsalaǵan eki bloger 2023 jyly kúzde ustaldy.