SQO-da bilim bóliminiń býhgalteri jeti jylǵa sottaldy
PETROPAVL. KAZINFORM – Soltústik Qazaqstan oblysynda Aıyrtaý aýdandyq bilim bóliminiń býhgalteri 40 mln teńgeni qaltasyna basqan.
Bul oblystyq prokýratýranyń tekserisi barysynda anyqtaldy.
Qadaǵalaýshy organnyń málimetinshe, prokýratýra organdary bıýdjet qarajatyn tıimdi ári maqsatty jumsaý salasyndaǵy zańdylyqtyń saqtalýyn turaqty baqylaýda ustap otyr. Nátıjesinde óńirde asa iri kólemde qarjy jymqyrý faktileri anyqtalyp jatyr.
Aıyrtaý aýdanynyń bilim bóliminde júrgizilgen tekserý barysynda mekeme býhgalteriniń bıýdjet qarajatyn júıeli túrde urlaǵany anyqtaldy. Tergeý barysynda onyń 2021 jylǵy qańtar aıynan bastap 2024 jylǵy sáýirge deıin bıýdjet qarajatyn qaltasyna basqany belgili boldy. Býhgalter aýdannyń bilim berý uıymdary qyzmetkerlerine jalaqy retinde jalpy somasy 39,8 mln teńge kólemindegi qarajatty zańsyz aýdaryp otyrǵan.
Osyǵan oraı aýdan prokýratýrasy byltyr Qazaqstan Respýblıkasy Qylmystyq kodeksiniń 189-baby 4-bóliginiń 2-tarmaǵy (senip tapsyrylǵan bóten múlikti ıemdený nemese ysyrap etý) boıynsha sotqa deıingi tergep-tekserýdi bastady.
Aıyrtaý aýdandyq soty bilim bóliminiń býhgalterin kináli dep tanyp, oǵan memlekettik jáne qarjy uıymdarynda materıaldyq jaýapty laýazymdardy atqarý quqyǵynan 7 jyl merzimge aıyrý, sondaı-aq 7 jylǵa bas bostandyǵynan aıyrý jazasyn taǵaıyndady. Úkim zańdy kúshine endi. Al memleketke keltirilgen zııan tolyq kólemde óteldi.
Sonymen qatar, prokýrorlyq qadaǵalaý aktisiniń negizinde Aıyrtaý aýdandyq bilim bóliminiń basshysy zańbuzýshylyqtarǵa jol bergeni úshin atqaryp otyrǵan qyzmetinen bosatyldy.
Buǵan deıin «Reseı temir joldary» fılıalyna qatysty tergep-tekserý bastalǵanyn jazǵan edik.